Lagda sa kampanya

Dungan sa pagsugod sa kampanya alang sa lokal nga mga kandidato gipahibawo sa Commission on Elections ang mas lugak nga lagda sa kampanya.

Si Comelec Commissioner George Garcia mipahibawo nga sa di madugay moluwat ang Comelec en banc og bag-ong lagda alang sa kampanya.

Sumala pa niya nga itugot na ang 100 percent capacity sa kampanya diha sa mga lugar nga ubos sa Alert Level 1 samtang 70 porsiento sa Alert Level 2.

Wala na sab kinahanglana ang permiso gikan sa campaign committee gikan sa Comelec apan kinahanglan gihapong mangayo og permit gikan sa local government ang mga kandidato alang sa ilang mga kalihukan sa kampanya.

Apan hugtanon gihapong gidili ang pagpanglamano, beso-beso ug selfie.

Ang dakong problema unsaon pagpatuman ang maong lagda?

Kun basihan ang sitwasyon pagbukas sa kampanya niadtong Biyernes, tingali ang independente nga si Cris Saavedra ra ang wala makalapas sanglit nag-inusara siyang nangampanya.

Apan ang ubang kandidato dinhi sa dakbayan gihugupan sa ilang mga dumadapig.

Dili sab nimo mabasol ang mga kandidato kun mohangop sa mga tawo sanglit anaa sila taliwa sa kampanya ug nangulitawo sila sa mga butante.

Di kang kapaabot nga iwakli sa mga kandidato ilang mga dumadapig nga buot molamano ug mogakos nila.

Busa ang maong lagda way kapuslanan. Mas praktikal og hingpit nalang gilibkas ang maong mga lagda.

Dili sab makiangayon nga ang mga local government maoy hatagan og gahom pag-isyu og permit tungod kay mahimong gamiton ni sa mga incumbent batok sa ilang mga kaatbang.

Mas patas og ang campaign committee sa Comelec maoy mohatag og permit sa mga kalihukan sa kampanya aron dili kapahimuslan sa mga incumbent.

* * *

Usa diay sa mga nagpapili pagkakonsehal diha sa lungsod sa Argao ang akong higala nga si Jovani Gelbolingo.

Anak siya sa ni Kuya Johnie Gelbolingo ug Ate Fe nga kaliwat og mga Camello ug Villamora diha sa habagatang lungsod sa Argao.

Si Jovani buotan ug matinabangon. Una nako siyang nailhan dihang nangita ko og materyales nga magamit sa naguba nga atop sa among panimay tungod sa bagyong Odette.

Bisan dili pa mi kaila apan wala siya magduhaduha pagtabang nako sanglit siya nagsilbing sales supervisor sa Puyat Steel.

Hinaut suportahan sa mga taga Argao ang iyang tinguha nga moserbisyo. Sigurado ko nga siya kasaligan ug kugihan.