Kun nahimong pragmatic ang paghinulsol

Marso 27, 2022: Ikaupat nga Domingo sa kwaresma Laetare Sunday

Mga Pagbasa: Jos. 5;9a, 10-12/Sal. 34/ 2 Cor. 5;17-21/Lk. 15;1-3,11-32

Ang pulong pragmatic gikan man sa pulong pragmata nga nagkahulogan og kahimanan kun tool. Ang gihimo sa anak nga mausikon nga paghinulsol pinasikad man sa practical nga rason aron lamang nga mo-survive. Sayud siya sa iyang dakong sayop nga naglangkob ning mosunod:

1. Dili maayo nga mangayo sa amahan sa katigayonan labina kun siya buhi pa. bahinon lamang ang katigayonan kun patay na ang amahan. Sa iyang pagpangayo sa ingon sama ra nga nangindahay siya sa kamatayon sa iyang amahan.

2. Dili manghod maoy modumala sa katigayonan kondili ang maguulang.

3. Human nimo makuha ang imong bahin dili makatarunganon nga mobiya ka sa dapit sa imong amahan. Usa kini ka dakong insulto alang sa imong banay ug kaparyentihan.

4.  Dili pud maayo nga ibaligya ang imong bahin usa kini ka dakong pagtamay sa imong amahan.

Sa laing bahin , ang amahan sa dihang nakita niya ang iyang nagdulong nga anak iyang gihimo kining mosunod:

1. Pagsugat kaniya ug paggakos kaniya. Basin unya og dunay laing sakop sa tribu nga makasugat kaniya, nagkahulogan kini og kamatayon.

2.  Gisul-ob niya ang pinakaanindot nga bisti agig pagpakita sa pagdawat sa anak nga masupilon, ang sapatos nga nipabalik sa dignidad sa iyang anak. Ang singsing nga nipabalik sa iyang katungod isip anak.

3. Ang kasaulogan ug kombira nga nagkahulogan og katilingbanong pagdawat. Pahibalo kini gikan sa Amahan nga gipasaylo na niya ang iyang anak busa dili na siya angay hilabtan sa kadaghanan.

Ang Anak nga Magulang ang nakasala usab tungod kay:

1. Iyang giakusar ang iyang manghud sa pakiglambigit niini sa mga dautang babaye bisan kun wala matino ang sala niini samtang tua kini sa halayo.

2. Iyang gisudyaan ang iyang amahan bisan pa man kun wala siyay katungod sa paghimo niini.

Apan bisan pa man ning tanan ang Amahan mipakita sa iyang dakong gugma ngadto sa iyang mga anak. Nipasaylo siya sa gihapon. Nahigugma siya sa gihapon. Malisud baya kini apan ang pagpasaylo kinahanglanon dili tungod kay gimahal nato ang sad-an kondili malaumon kita nga kun siya pasyloon unta siya mabuotan.