EDITORYAL - Peace covenants

Aron mopatigbabaw ang hapsay ug malinawong piniliay karong Mayo ning tuiga, subling nipasiugda og peace covenant signing ang Commission on Elections inabagan sa kapolisan ug ubang stakeholders. Kini aron pagawhag sa mga kandidato nga likayan ang paggamit og bayolenteng kalihokan batok sa ilang mga kaatbang o ba kaha sa mga supporters sa ilang mga kaatbang.

Ang mga local nga kapolisan uban sa Comelec mipapanumpa sa mga modagan nga sila magpabiling kalma ug dili maoy maguna-una og buhat og kagubot atol sa kampanya ug sa mismong adlaw sa piniliay.

Apan sa nanglabay nga mga katuigan, maihap ra man gyud sa tudlo nga ang mismong kandidato ang nagsugod og away o kasamok. Ang kagubot o bingkil anha kanunay magsugod sa mga supporters.

Mga supporters nga dili gustong mabintahaan sa mga kaatbang. Apan ang mas grabe niini, kani gyung mga supporters nga mao gyuy maguna-una og panghasi sa mga supporters sa kaatbang sa ilang kandidato.

Unsa may makuha aning uban nga maghimo man og sama niini nga mga dili maayong binuhatan? Gibayran ba sila sa ilang mga kandidato o sobra gyud ang ilang pagka-loyalista?

Ang maayo sa mga kandidato, adlaw adlaw gyud nilang pahimangnoan ilang mga supporters nga likayan ang pakiglalis o pakigaway sa mga supporters sa ilang mga kaatbang.

Anha lang daugon unta sa panindotay og plataporma ug mga ipamulong sa mga tapuk-tapok sa mga kandidato diha sa nagkadaiyang lugar ug dili magpasikat pinaagi sa pagpangita og kagubot.

Ang Comelec sab unta dili na kinahanglang paabuton pang dunay bayolenteng mahitabo. Dili lang unta sila kutob sa pagpaabot kun dunay moreklamong kandidato batok sa ilang mga karibal.

Dapat sila mismo aktibo o proactive sa pagsanta anang bayolenteng mga pagabuhaton sa mga kandidato aron dili modako ang gubot.