Bay’ri na uy!

Dili gamay nga kantidad ang P23 bilyones nga giingong maoy kantidad sa buhis nga wa bayri sa banay’ng Marcos, diin si kanhi senador Bongbong Marcos ug Imelda Marcos ang gitudlo nga sumosunod ug maoy angay’ng mobayad sa estate tax.

Gani, tungod kay ang maong kantidad kaniadto pa man kining 1997, giingong misaka na ang maong kantidad tungod sa penalty. Kon ako pa si Bongbong, unya may kwarta ko nga ikabayad, akong bayran ang maong obligasyon.

Pinaagi niini, mahimong “humot” kaayo siya sa katawhan ug siguradong kadaghanan mobotar kaniya. “Final and executory” na ang hukom sa Bureau of Internal Revenue nga pabayron gyud si Marcos sa maong kantidad, apan padayon siyang nagdumili.

Para nako, salikwaot kaayo nga siya magtinguha pagka presidente sa nasud unya dili siya motuman sa mga balaod. Kon siya mapili, sigurado ko nga wad-on niya ang Presidential Commission on Good Government (PCGG).

Apan naglibog ko nganong ang katawhan, kana kon toohan nimo ang resulta sa giingong survey, daghan man kuno ang nakagusto kang Bongbong?

Wa gyud sila maghunahuna nga kang si Bongbong wa gani mobayad sa buhis karon nga sibilyan pa siya, mosamot na gyud kon mahitabo nga makadaog siya pagka presidente.

Igo lang ko nga nagpasabot ug wa ko moendorso og kandidato kon kinsa ang inyong pilion. Gusto lang nako nga ang katawhan unta mahigmata sa tinuod nga isyu.

Aw, hinuon, mora’g nakabantay ko nga may mga higayon nga ang rason diay nga daghang manambong sa political rallly ni BBM kay manghatag man diay’g kwarta sa mga motambong.

Nasakpan sa Rappler didto sa Nueva Ecija nga pagpanggawas sa mga mitambong sa rally nilang BBM, ang tanan gipangtunolan og subre nga may P500.

Si Senador Manny Pacquiao sab dugokon sa mga tawo kon mobisita og lugar kay manghatag man sab og kaging kaayo nga tag P1,000. Apan pipila ra man sab ang hatagan kay mosibat man sab dayon.

Dili nato mabasol ang mga tawo kay duna man gyuy nanginahanglan. Apan para nako, angay’ng masuko kadtong wa makadawat.

Kon gusto si Pacquiao nga motabang, mo-coordinate siya sa mga lungsod, o siyudad, barangay, aron ang tanan iya gyud nga mahatagan. Kon iya ning himoon, modayeg gyud ko.

* * *

Hangtod karon, daghan pa kaayong mga taga Cebu City nga nagpangita kon hain na ang gipanghatag nga tag P5,000 nga hinabang sa mga nabiktima sa miaging bagyo.

Giingong “house-to-house” ang pagpanghatag apan ang mga silingan nako diri sa Barangay Apas taas na kaayo’y liog nga nagpanglantaw kay wa man gyuy miabot.

Ambot og naa ba gyuy para sa ila. Basin gipili ra gihapon.