Ilegal na droga sa Infanta
Nasakote ng National Bureau of Investigation (NBI) ang isang Chinese national at 10 iba pa na sakay ng tatlong SUV at may dalang 1.5 toneladang shabu sa Infanta, Quezon noong Martes. Nahuli ang mga suspek sa isang checkpoint sa Bgy. Comon. Ang shabu ay nakasilid sa 600 Chinese teabag at may street value na P12 bilyon.
Ayon kay NBI director Eric Distor, malaking sindikato ang nasa likod ng shabu heist dahil high-tech ang mga gadgets na nakumpiska nila sa mga suspek. Ayon kay Distor, ang shabu ay idinadaan sa karagatan na may mga kakutsabang mga mangingisda para maiahon ang mga inihagis na shabu sa karagatan sa Polillio Island.
Dahil sa pangyayaring ito pinangangambahan ng mga awtoridad na ang Infanta ay posibleng maging crime capital ng Southern Luzon.
Tutulug-tulog ba ang PNP, Gen. Dionardo Carlos? Kung nakalusot ang 1.5 toneladang shabu, tiyak na maraming Pinoy ang masisira ang kinabukasan. Siguradong lalaganap ang krimen hindi lamang sa Infanta, kundi sa buong Luzon.
Ayon naman kay Major Francis Aldrich D. Garcia ng Infanta Municipal Police Station (MPS), may natanggap silang tip na may isang Nissan van may lulan ng mga ipinagbabawal na droga.
Dapat ang unang hulihin ng PNP ay ang mga mangingisda na binayaran ng sindikato. May mga report na ibinili pa umano ng drug syndicate ng mga bangka ang mga mangingisda para gamitin sa pagsagip ng mga inihagis na droga sa karagatan. Kung hindi madadakma ang mga mangingisda, patuloy na makalulusot ang sindikato ng droga at darami ang krimen sa Infanta.
Tulungan natin si Gen. Carlos na malutas ang paglaganap ng droga sa Infanta, Quezon.
- Latest
