EDITORYAL - Ayuda tinubdan sa kurapsyon

Nagsugod na og tiyabaw ang mga drayber bahin aning sagunson nga pagsaka sa presyo sa produktong petrolyo. Ang matag litro karon lapas na sa P80, depende kun asa nga gasolinahan magpatubil.

Ang pagsaka sa presyo nakatandog sa tanang sektor sa nasud, gikan sa mga magpapatigayon ngadto na sa mga konsumidor. Ingon niana kadako ang epekto.

Milanog na karon ang mga panawagan ug demanda sa mga transport groups nga mangayo og umento sa pletihan tungod kay mahal na lagi kaayo ang petrolyo. Ang uban nila mihulga na nga dili nalang una mobiyahe tungod sa kamahal.

Kung dili sila mobiyahe maapketahan gyud ang paglihok sa mga tawo nga nagsalig aning mga public transports. Kun mahitabo kini, mosamot ang problema tungod kay daghan man ang mga patigayon nga maapektahan.

Ang gobiyernong Duterte gipanawagan nga suspensohon lang una ang pagkolekta og excise ug value added taxes gikan sa mga produktong petrolyo.

Apan inay mga dawaton ug ipatuman ang panawagan, mas gipili ni Duterte nga pahatagan og tag P200 nga ayuda matag bulan ang mga pamilya. Paigo diay nang P200 karon?

Kaning pagsige og panghatag sa gobiyerno og ayudad sukad pa sa pagigo sa pandemiya naputos na kaayo sa mga kontrobersiya sa kurapsyon.

Daghang mga angayan untang tabangan mao naman hinuoy wala makadawat samtang kadtong dili unta angayan apan kay duol sa luwag mao may gihimong prayoridad. Maglisod man sab pagpasaka og reklamo ang mga wala nakadawat tungod kay hasolan naman sila paggukod niini.

Usa pa, madumtan sila sa ilang mga barangay officials nabalaka silang sa sunod nga dunay mga panghatag nga ayuda samot na gyud silang dili makadawat o dili apilon sa lista. Usahay ang mga tawo karon mas mangugi naman hinuon anang pagpalista inay motrabaho aron mokita. Kini tungod kay mismo man ang gobiyerno maoy nagsulsol kanila nga magtinapolan pinaagi sa paghatag aning mga ayuda.

Apan kun  kining excise ug VAT taxes sa produktong petrolyo maoy hunongon una og kolekta sa gobiyerno ug pasak-an ang  Sin taxes  tananng sektor sa nasud maoy mabulahan ug dili na unta kinahanglang magsalig sa ayuda ang mga tawo.

Ang ayuda nahimo karong hinungdan nga natapolan ang mga tawo ug mas nahimo pa karong mga reklamador.