Gustong ibaligya ang kabilin sa iyaan

Dear Atty. Divine,

Dunay na-inherit ang akong mama nga property gikan sa akong iyaan nga igsuon sa akong lola. Ang akong iyaan namatay nga way anak. Duna siyay mga igsuon  walo ka buok ug apil na niini ang akong lola. Apan ang property wa gyud nabalhin sa pangan sa mga heirs kay si lola sa dihang buhi pa siya, wa na masayud kun asa na ang iyang mga igsuon nga nangaminyo ang uban sa  Visayas ug Mindanao. Pagkamatay sa akong lola, ang akong mama maoy gibinlan sa property ug wa sab kini mabalhin sa name sa mga heirs kay wa man makaila si mama sa mga igsuon ni lola. Namatay na sab ang akong mama ug ako na ang gibinlan sa property. Nagtuo sab ko nga patay na ang mga gisuon sa akong lola ug wa lang ko masayud kun kinsay ilang mga kaliwat nga nahibilin. Naay gusto unta nga mopalit sa property, unsay angayan nako nga buhaton attorney aron mabaligya ang property? Daghang salamat. — Edgardo

* * *

Dear Edgardo,

Kun ikaw ang nearest relative sa tag-iya sa yuta, mamahimog ikaw ang mobaligya niini or kun naa kay mga igsuon uban ang imong mga igsuon pinaagi sa pag-execute og Extrajudicial Partition with Sale or kun ikaw ra usa, Affidavit of Self Adjudication with Sale. Kinahanglan nga bayran ang estate tax sa imong iyaan og sa imong inahan aron ma-process ang pag-transfer sa yuta. Apan kun pananglit in the future naay motunga nga heirs ug mangayo og bahin then obligado gyud ka nga mohatag kanila sa ilang share kay basi sa balaod ang pwede ra nimo nga mabaligya kutob ra man unta sa imong share. Hinuon wa ta masayud kun buhi pa ba ang mga kaliwat sa imong lola apan sa kadaghan nila most likely anaa pa gyuy mga kaliwat niini nga nahibilin. Busa kun interesado gyud kang mobaligya pwede man kini nimong buhaton apan kun dunay motunga in the future nga heirs og mangayo og bahin sa halin obligado gyud ka nga mohatag kanila. Ang problema lang kun yuta ang ilang kuhaon og dili ang halin. Pwede nimong sultian ang buyer sa sitwasyon aron dili ka maalanganin kun imo ning ibaligya unya dunay kalit nga motunga nga heirs in the future.  Thank you and God bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.