Kompaniya sa lana ang gamhanan

Kining mga kompaniya sa lana mora’g Russia samtang kitang mga konsumidor murag Ukraine nga kanunay maigo sa pagbombardiyo sa ka mahal sa presyo petroleum products.

Karong adlawa lang gipatuman na usab ang gitawag nilang super one-time, bigtime oil price hike nga mora’g missile sa ka powerful nga nakapahagba gyud intawon sa mga tawo. Laliman mo nang P13 kapin ang umento sa diesel ug P7 sa gasolina.

Kuwang pa ni kay sa sunod semana laing umento na sad ang atong atangan. Unsa kaha atong itawag niini, super mega oil price for all season na. Pastilan dili na gyud mabangbang ang kalisod nga sagubangon nato.

Wala nalang gyud bay mahimo ang atong gobiyerno pagpugong sa umento sa presyo sa lana nga nagpatuyang lang ang mga kompaniya nga nagsabot lang pila ug kanus-a sila mopauwan og bomba, este mopatuman sa umento nga hilabihan ra ba ka dako.

Samtang dili pa ma-repeal ang balaod nga nagproteher kanila, magpabilin silang gamhanan nga dili gyud matarog samtang ang mga ahensiya nagsige pa og hunahuna unsaon nila sa pagsulbad ang problema nga nakalamay na.

Susama sa usa ka yanong hilanat ang problema apan wala dayon masolusyoni hangtod nga nikalamay ang sakit nga misangpot sa severe pneumonia nga siguradong moresulta sa grabeng danyos, ang sitwasyon sa presyo sa lana karon walay kalainan sa balatian sa tawo.

Dunay sugyot nga bakwion una ang excise tax. Apan dili pud mosugot ang Department of Finance kay dako kaayo ang mawagtang sa panudlanan sa kagamhanan nga magamit sa mga programa alang sa katawhan.

Moburot lagi ang kita sa gobiyerno apan nagkamang sad ang mga tawo tungod sa epekto sa presyo sa mga palaliton mugna sa taas nga presyo sa lana. Dili nako ma-imagine ang sangpotanan niining tanan kay sa pagkakaron ang pag-atake sa Russia sa Ukraine mora’g wala pay kahumanan nga nagpasabot nga mograbe pa gyud ang pagpaantos kanato sa mga oil companies.

Imposible nga kada semana mahurot dayon ang kinompra nga produktong petrolyo sa mga kompaniya, gigamit lang nila ang sitwasyon aron makapaumento, kong dili kalikayan ang oil price hike kay apektado sila dili ba mahimo og binuwan o kada duha ka semana?

Kong anaa pa silay gamay nga pagbati mas maayo unta nga utay utayon nila ang umento aron dili ta atakehon sa kasing kasing sa ka dako nga makalumos gyud.

Gamhanan kaayo karon ang mga oil company kay bisan ang kagamhanan walay mahimo sa pagpakgang kanila.