Ayaw salig sa survey

Matag hawong sa eleksiyon manglugwa dayon ang mga survey mahitungod sa politika sa nagkalainlaing pinili nga posisyon sa lokal ug nasudnong kagamhanan. Sa mga survey nga gihimo lainlain ang resulta nga migawas sama sa survey sa pagka Mayor dinhi sa dakbayan sa Sugbo.

Niadtong Pebrero 1 ning tuiga ang Pulse Philippines Survey mipagawas sa resulta sa gihimo nilang survey sa pagkamayor dinhi sa dakbayan sa Sugbo diin si kanhi konsehal Margot Osmena nakakuha og 46 porsiyento, Mayor Mike Rama 25 porsiyento ug konsehal Dave Tumulak 23 porsiyento.

Niadtong Marso 1 ning tuiga ang RP Mission and Development Foundation Inc. mipagawas pod sa rersulta sa ilang survey nga gihimo diin nag una sa pagka mayor si konsehal Dave Tumulak nga nakakuha og 38 porsyento ug gisundan siya nila ni Mayor Mike Rama nga nakakuha og 30 porsiyento ug kanhi konsehal Margot Osmena nga may 25 porsiyento.

Laing survey ang migawa sa Social Media nga nagpakita nga si Margot Osmena nakakuha og 58 porsiyento, Dave Tumulak nga nakakuha og 41.5 porsiyento, Crisologo Saavedra (0.5) porsiyento ug Mike Rama nga nakakuha og negatibo nga dos porsiyento.

Karon pa ko makadungog og survey nga may kandidato nga nakakuha og negatibo  porsiyento. Ambot, tinuod ba kaha kining maong survey.

Sa akong nahibawan, sa mga survey nga gihimo sa mga survey agencies sama sa Social Weather Stations ug Pulse Asia ang negatibo o positibo nga porsiyento nga ilang ipagawas  mao lamang ang margin of errors.

Tungod sa pag uso sa mga political survey matag hinangat sa eleksiyon, ang University of the Philippines School of Statistics mipahimangno sa publiko sa pagbantay sa ilang gitawag nga street survey nga dili kasaligan tungod sa kakuwang sa methodology o paagi sa pagsurvey.

Kinahanglan gayod nga magmatngon sa mga survey ug sugyot nako ayaw ibasi ang Inyong pagpili sa resulta sa survey hinuon ibasi kini sa agi o kasinatian ug katakos sa pag alagad.

Kun imong itandi sa uban nga nagpapili sa pagka mayor sa dakbayan sa Sugbo, si Mayor Mike Rama lamang ang may taas na nga kasinatian ug katakos sa pag alagad.