EDITORYAL - Curfew maayong balikon?

Migara na sab kining mga batan-on nga kuwang mga disiplina sa kaugalingon karon nga gipaluagan na og maayo ang mga restriksyon sa Covid-19 health protocols.

Ning nanglabay nga mga adlaw, dunay mga report nga karambola tali sa mga batan-on sa Dakbayan sa Talisay ug sa Dakbayan sa Sugbu.

Ang duha ka hitabo parehong dunay kalambigitan sa pag-inom o sobrang kahubog.

Sa dihang higpit pa ang restriksyon sa nakalabay nga mga buwan tungod kay taas pa ang mga kaso sa Covid-19, pwerteng mingawa sa kadalanan kay duna may curfew nga gipatuman. Gani nawili na og maayo ang mga polis anang mga panahona gumikan kay wala na halos silay masuwat nga krimen sa ilang police blotters kay hapsay ug malinawon kaayo ang tagsa-tagsa nila ka hurisdiksyon.

Gawas pa, tungod sab sa maong curfew mas daghang kabataan ang nasalbar gikan sa mga dautan.

Dautang bisyo, dautang barkada, dautang panghitabo nga posibleng sila maoy mabiktima o sila maoy makasala sa uban. Apan karon nga miluag naman ang restriksyon ug wala nay curfew, mura man og mga kabayong nakaikyas sa toril ang mga kabataan. Badhas diri, badhas didto, kasagaran sa mga imnanan.

Maayo para sa uban nga nakauli nga malinawon, apan duna say uban nga nakapaag hinuon og away. Karon, magatubang na hinuon og mga kaso.

Tungod niini, dunay mga nakaingon nga mas maayo pang ibalik ang curfew aron makontrol kining mga kabataan. Apan sakto ba kini?

Dili. Kini tungod kay dili lang mga kabataan ang nabulahan aning palibkas sa curfew, mas daghan ang mga tawong nakabenepisyo pinaagi sa pagpanarbaho bisan disoras na sa gabii.

Ang maayong buhaton niini mao ang subling pagpangusog sa kapolisan sa police visibility sama sa ilang gihimo sa dihang gipatuman pa ang curfew.

Kinahanglang naa sila duol aning mga lugar nga suroyanan sa daghang tawo ilabi na panahon sa kagabhion.

Kay aning paagiha, mapakgang nila dayon kun adunay mga kagubot ug sa samang higayon maprotektahan nila ang mga tawong nanginabuhi panahon sa gabii gikan sa mga badlungon ug mga dautang elemento.