Tam-is nga kalamposan human pait nga kasinatian

Biya sa ta sa mga estoryang makapabukal sa dugo, diri ta sa estoryang makapabuhi sa dugo nga maghatag kanato og inspirasyon sama nalang sa sugilanon sa nag top 2 sa Mechanical Engineering Licensure Examination nga produkto sa University of Cebu nga si Mark Allen Armenion.

Sa wala pa niya makab-ot ang tam-is nga kalamposan misuong usa siya sa pait nga kasinatian tungod sa tumang kalisod diin nahagbong gani siya sa Grade 3 kay kanunay lang matulog sa klase, dili tungod kay tapolan siya kon dili tungod sa kagutom.

Matud ni Mark nga mosulod siya sa eskwelahan nga walay sulod ang tiyan kay wala man lagi silay pagkaon niadtong higayona kay problemado ang iyang mga ginikanan, moinom lang siya og daghang tubig apan dili man gyud madala mosakit man iyang ulo hangtod nga ikatulog nalang niya ang kagutom nga miresulta nga nakaangkon siya og 65 nga grado.

Ingon niini ang iyang kinabuhi hangtod nag-high school diin nakabalik o repeater na usab siya sa third year kay magsegi ra man og absent kay walay kwarta ug labaw nga walay makaon.

Aron makasugakod nag kargador siya sa merkado, maghakot og tubig ug bisan unsa nga sugo kaniya iyang gihimo aron lang masuholan ug iyang magamit sa pagtungha.

Gani naka-experience siya nga natulog sa Plaza sa Mandaue kauban ang mga batang libud suroy, nahimo siyang bugoy bugoy kaniadto apan wala siya mosuway sa pagbisyo.

Giklaro ni Mark nga giatiman man siya sa iyang inahan apan kuwang lang gyud ang kita niini nga ikasuporta sanglit ginagmay ra man ang income nila.

Pinaagi sa pagdasig kaniya sa iyang mama nga moeskwela sa kolehiyo, nakapangita sila og pamaagi nga mopadayon sa pagtungha pinaagi sa scholarship sa UC ug mao na kadto ang sinugdanan sa iyang pagsubay sa tui-id nga dalan, nakasinati gihapon sila og tumang kalisod apan naanad na siya ug mas milig-on pa.

Tungod kay bright siya sa Math nahimong sayon kaniya ang gikuhang kurso, sa sinugdanan pa lang target na niya nga mag top sa board exam, gani nag invest siya sa pagpalit og mga libro diin 10,000 ka mga problems ang iyang gibansay sa pagtoon aron lang gyud seguradong mag top ug nahitabo gyud ang iyang gipangandoy.

Sekreto ni Mark mao ang hugot nga pagtoo sa Ginoo nga maoy nahimo niyang sandigan sa higayon nga duna siyay mga gikinahanglan nga impossible kunong maabot apan gihatag kaniya sa Labawng Makagagahum.

Kaniadto M.E. o Murag Engineer ra si Mark, karon usa ka gyud ka certified M.E. Mechanical Engineer ang kanhi kargador ug repeater sa klase tungod sa iyang pagpaningkamot.

Walay impossible dream kong maningkamot nga mamahimo kining reality.