One more chance!

Mihangyo ang COMELEC sa publiko nga hatagan ang bag-ong natudlo nga mga commissioners sa kahigayonan pagpamatuod nga sila impartial ug neutral pagresolbar sa mga kaso nga gisang-at sa maong buhatan.  Karaan’g cancion ang hangyo sa COMELEC.  Ang ilang nangagi’ng binuhatan maoy nag-umol sa opinyon sa tawo batok kanila.  Labot pa, sa atong pagkatawhanon, malisod nga dili mahimong bias ug impartial sa atong paghukom.  Hinuon, ang tanan angayan man hatagan og bag-ong kahigayonan, apan dili aron paghimo sa mao gihapon nga sayop.  Madahaan!

Dili debate ang sulbad

Nanawagan si Professor Walden Bello sa COMELEC nga mo-imponer unta kini’g bug-at nga silot niadtong mga kandidato nga dili mosalmot sa debate nga ilang ipahigayon.  Alang kang Bello, nagyagâ-yagâ lang ang COMELEC sa ilang kaugalingon ni’ng ilang taphaw nga silot sa absent nga kandidato.  Sa gipakita’ng kinaiya sa ubang kandidato atol sa debate, sama ra nga nagtan-aw ka’g duha ka sapatos nga naglalis kon kinsa kanila maoy mouna pagpatid sa atong lisik.  Inay mapadayag ang kamatuoran, matabunan na hinoon kini.  Dili debate kon dili praktikal nga solusyon sa suliran sa nasud ang gikinahanglan sa tawo.  Fezteleern!

Dili uyon sa eleksyon

Giawhag ni Mayor Sara Duterte ang katawhan’g Pilipino sa pag-ampo alang sa usa ka matinud-anon, hapsay ug malinawon nga eleksyon.  Nanawagan usab si Mayor Duterte sa panaghiusa sa tanang sektor sa katilingban nga walay pagtan-aw sa politikanhong bulok.  Dili man tingale mag-apil-apil ang Ginoo sa atong pagpahigayon sa eleksyon. Anaa sa katawhan ug sa kandidato ang kagahum pagpahigayon sa hapsay ug malinawon nga eleksyon.  Kay kon ganahan pa ang Ginoo mag-apil-apil sa eleksyon, wala unta kita Niya padalhi’g mga apostoles kon dili mga politiko unta.  Hala no!

Gobiyerno ang suliran

Matud ni Presidential Spokesperson Martin Andanar, tun-an pa sa Malacañang ang posibleng pagdeklarar og State of Economic Emergency nunot sa nasinati nga pagping-it sa katawhan sa padayon’g pagsaka sa presyo sa lana.  Balik-balik na ang maong suliran apan makapahibulong nga wala pa’y nalatid hangtud karon nga andam nga solusyon ang gobyerno sa maong matang sa suliran.  Ni’ng kahimtanga, mora’g sakto ang panahom nga “ang gobyerno dili maoy sulbad sa atong problema, hinonoa, ang gobyerno mao mismo ang problema.” Maypa’g moligeeed!

Higugmaa ang kaaway

Gidakop sa mga awtoridad ang usa ka Juanito Gaviola human gisumbong nga mipahit sa dalunggan sa iyang kauban sa inom.  Gikataho nga nagsige’g pangayo’g sabaw sa tindera ang suspetsado busa gibadlong sa kauban nga maoy hinungdan sa ilang panag-away.  Dili maayo nga sabaw lang ang sumsuman sa inom mao tingale nga gipahit ug gikilaw sa suspetsado ang dalunggan sa iyang kauban.  Ginaingon nga kaaway sa tawo ang ilimnon’g makahubog, apan bisan kon magmaoy moinom gyud gihapon ang tawo.  Subay tingale kini sa pagtulon-an sa bibliya nga nag-ingon, “higugmaa ang imo’ng kaaaway”.  Kampai!

PERSONAL NOTE: Akong mainitong pagtimbaya kang Britt Flores sa iyang pagsaulog sa kasumaran sa iyang adlaw’ng natawhan karong adlawa.  Happiest Birthday Britt!!!