EDITORYAL - Pagpabalik sa kalagsik sa katawhan

Makapabalik sa gana sa katawhan kining mga paglugak sa restriksyon sa Sugbu. Ilabi na sa mga umaabot nga mga relihiyosong mga kalihokan karong Semana Santa.

Makatarunganon lang sab nga libkason na kining mga restriksyon tungod kay taliabot man ang eleksyon ug dili man gyud kapugngan ang pagdugok sa mga tawo bisan gidili kun panahon nga dunay mga political rallies.

Ikaduha, daghan naman sab ang bakunado, basta kinahanglan lang gyud nga dili kalimtan sa mga tawo ang pagsuot og face mask sa ilang mga kalihokan.

Kani sab taliabot nga Semana Santa daghang mga naandang mga relihiyosong kalihokan nga gusto nang buhaton pagbalik sa mga tumutuo.

Aning paagiha sab, dili maputol ang mga tradisyon nga gipasa sa mga katiguwangan ngadto sa ilang mga kabataan nga dugay nang gitamdan sa matag pamilya kun panahon sa Kwaresma.

Ang pagtugot aning mga relihiyosong kalihokan makapabalik sa kinabuhi sa mga tawo ilabi na sa ilang pagsalig ngadto sa gobiyerno.

Gawas pa, makapalagsik sab kini sa turismo samot na nga umaabot na ang ting-init ug naandan naman nga aning mga buwana modagsa ang mga lokal ug langyaw nga mga turista gikan sa nagkalain-laing lugar.

Kun daghang mga aktibidades man gud sa usa ka lugar magtuyok ang ekonomiya. Daghan ang makatrabaho nga mga tawo ug magpasulod sab kining mga turista og dugang income ug buhis para sa lokalidad.