Mga bag-ong hagit sa umaabot nga eleksiyon

Nagkaduol na gyud ang piniliay karong Mayo 9 hinungdan nga nagkapuliki na halos ang tanan nga adunay kalambigitan sa eleksyon.

Gawas sa mga kandidato ang mga frontline agencies usab ang mora’g nagsugod na sa pagsangag sa ilang mga gimbuhaton karon pa lang ilabi na ang Commission on Elections.

Unang higayon kining eleksiyona nga natunong sa pandemic busa masuwayan gyud ang katakos sa ahensya sa pagpatuman og mga lakang nga ipahaum sa kahimtang karon.

Daghang mga hagit ang ilang atubangon ug ang labing dako siguro mao ang mga eskwelahan nga magsilbeng voting centers kay gilampornas man sa bagyong Odette, murag wala kaayo matutoki karong panahona.

Akong nahinabi ang acting election officer sa Cebu City North District nga si Marilou Paredes kinsa mitug-an nga adunay mga tunghaan pa ilabi na sa mga bukirang dapit sa dakbayan ang wala pa gyud matandog karong panahona human gipahagba sa katalagman.

Gani usa niini nahimutang sa Barangay Pung-ol Sibugay nga ultimo ang gym dili na magamit pa kay naguhayguhay na samot na ang mga classrooms, ingon usab niini ang sitwasyon sa eskwelahan sa baranggay Babag sa  Cebu City.

Karon pa lang gipangitaan na og pamaagi sa Comelec kon usaon nga dili kini makamugna og sakit sa ulo. Unang himoon nila nga mag gama og tolda tolda sa gawas aron mamahimong voting center.

Ang pag-repair sa mga eskwelahan iya man sa Department of Education apan tungod sa kadako sa dapit nga apektado sa bagyong Odette ug sa kadaghan sa mga eskwelahan nga nangaguba dili gyud madali ang pag ayum ayum niini.

Busa gikinahanglan ang tabang sa uban sama sa lokal nga kagamhanan.

Hinuon mipasalig man si Mayor Mike Rama nga motabang sa pagpaayo sa mga classrooms nga nangaguba aron magamit sa katuyoan niini sa umaabot nga piniliay.

Laing suliran nga gikinahanglan nga iresolbar karon pa lang ang kawalay supply sa kuryente ug ang I nternet connectivity kay daghan pa ang mga dapit nga wala pa maulii.

Naa may kuryente apan dakponon kaayo ang signal nga mahinungdanon kaayo sa pag transmit sa resulta sa piniliay.

Makapangalot man sa ulo ang taga Comelec kay ang mga nahabiling panahon karon dili gyud kaigo kong huna hunaon.

Okay ra man unta kadto kaniadto kay ang pandemic ra man ang ilang giproblemahan apan napon-an man sa niigo nga katalagman.

Hinuon walay dakong suliran nga dili masulbad kong adunay kooperasyon sa tanan, walay kapilian kinahanglan himoon nila ang ilang tahas, kaya ra lagi na.