Ang pag abli sa kalibutan sa mga bata

"I want to get vaccinated because I want to see the outside world." Mao kini ang kanunay nga isulti sa akong anak nga si Francis John Paul nga nag 8 years old usab karong adlawa.

Tataw kaayo nga sama sa akong anak, gipul-an na usab ang ubang mga bata nga kanunay lang anaa sa sulod sa balay o makasuroy man apan limitado kaayo gumikan sa pandemic.

Busa karon nga aduna nay kahigayonan nga makagawas na ang mga bata pinaagi sa bakuna mora’g nakakita na usab sila og kahayag nga makagawas na og makita ang nawong sa atong kalibotan.

Tinuod nagtuyok ang kalibotan sa mga bata sulod sa balay nga magsige lang og tutok sa gadget, apan lahi ra gyud kong anaa sila sa gawas makahugoy hugoy sa ubang mga bata.

Gani kanunay nga maghisgot ang akong mga anak kanus-a sila makabalik sa eskwelahan kay gimingaw na sila sanglit lahi ra man kong anaa sila mag atubang sa computer sa ilang virtual classes.

Nasugdan ang pagpamakuna sa nag edad og 5-11 years old niadtong Lunes samtang medyo nauwahi gamay ang dakbayan sa Sugbo niadting Miyerkules.

Gihimong theme park ang mga vaccination sites nga adunay daghang mga balloons, cartoon characters ug naa pay mga pagkaon aron malingaw ang mga bata ug dili kaayo mahadlok sa dagum nga itusok kanila.

Misaler baya pud ang pamaagi kay makita sa nawong sa mga bata ang kalipay luyo sa ilang kahadlok. Apan mas nagpasulabi ang kagustohan nila nga mabakunahan sa katarongan nga gusto na nilang mogawas sa balay, gusto na nilang makita ang kalibutan sa gawas, makasulod na sila sa mga mall ug uban nga dapit nga naandan nilang adtoon sa wala pa ang pandemic.

Naa naman gyuy bakuna alang niining mga edara nga gihangop sa mga bata ug sa mga ginikanan apan dili sad malikayan nga bation og kabalaka ang ubang mga ginikanan sa posibleng mahitabo sa mga anak.

Kini tungod kay unang higayon nga gamiton sa mga bata ang bakuna ug basin adunay dautang epekto sa umaabot.

Seguro ang uban nagpaniid pa lang ug ayha na mohukom kong maseguro nga luwas ra ang bakuna sama sa akong asawa nga hadlokan kaayo nga gustong masiguro ang tanan ayha pabakunahan ang among mga anak.

Mas maayo man pud siguro kini aron walay mahay simbako kong naay epekto ang bakuna mas maayo ang pagka sigurista karong panahona.

Kong bukas mo sa pagpabakuna adto lang sa mga vaccination sites aron mabakunahan ang mga bata. Apan kong dili pa andam ayaw lang usa pugsa.