"Goodbye my teacher"

Nagsugod na si Presidente Duterte sa pagpamutos ug pag-empake sa iyang mga gamit agi ug pagpangandam sa iya unyang pagbiya Malacañang nga sa bana-bana sa Presidente, dili na maabtan sa bulan sa Abril ning tuiga.  Dugang pa sa Presidente, wala siya masayod kon asa siya dalhon sa kapalaran apan masaligon siya nga dili siya pasagdan sa Diyos.  Daghan unya tingale ang mingawon sa Presidente apan seguro kita nga dili lakip niini si Senador Gordon.  Dili baya usab tanang pagbiya ug pagpanamilit makapasubô, sama pananglit kon moingon kita, “Goodbye my teacher, goodbye”.  Hala no!

Nangita bisan naglukdo na

Konsultahon sa COMELEC ang Civil Service Commission ug ang DILG kabahin sa isyu sa mga kandidato nga mogamit sa sakyanan sa gobyerno atol sa pagpangampanya.  Adunay silot kadtong mga empleyado sa gobyerno nga moapi-apil sa partisan politics apan wala pa matino kon silotan ba ang sakyanan nga gigamit.  Mura’g minaut man kining panahom sa COMELEC.  May katungod ang incumbent official pag-gamit sa sakyanan sa kagamhanan isip tinugyanan sa maong butang.  Wa pa gani maresolbar ang mga isyu nga gisang-at sa COMELEC, nangita na pud sila’g laing isyu.  Matud pa’s akong apohan, “naglukdo ka na’g ta-e, mangita ka pa’g laing ta-e’.  Madahaaan!

Debatehan aron maresolbar

Namahayag ang tigpamâbâ ni Bongbong Marcos, Jr. nga dili mosalmot ang naulahi sa mga presidential forum diin ang mga kandidato makig-debate sa usag-usa. Hinonoa, tambongan lamang nila ang forum diin ang hisgutan mao ang sulbad sa mga suliran sa nasud.   Maanindot baya ang debate kay sama man kini sa pag-interview sa buot mo-apply pagka-pangulo sa nasud diin ang katawhan maka-aninag sa kinaiya sa ila unyang botohan.  Labot pa, ginaingon usab nga, “mas maayo pa nga debatehan ang isyu bisan dili kini maresolbar, kay sa resolbahon ang isyu nga dili ipaagi og debate” Bitaw no!

Bayad sa saad

Ang mga kandidato nga buot mahimong pangulo sa Pilipinas nagsugod na sa ilang pagpangampanya, pinaagi sa pagpangulitawo sa mga botante ug pagsaad nga dalhon nila ang nasud ngadto sa kabulahanan.  Nagkalain-lain ang ilang pamaagi sa pagdani sa boto sa katawhan nga pulos mipasalig ug kausaban ug kalambuan.  Tambag sa katawhan: pagbantay sa mga saad sa politiko kay kini tanan pagabayran sa katawhan pinaagi sa pagpasaka sa buhis o sa dugang pagpangutang.  Fezteleern!

Ayaw butangi’g gasolina

Taliwala sa nagsige nga pagsaka sa presyo sa gasolina, wala pa’y itugot sa LTFRB nga pagsaka sa plitehan aron kuno dili madugangan ang palas-onon sa mga sumasakay.  Domino effect ang mahitabo kon mosaka ang presyo sa gasoline kay mosaka usab ang presyo sa batakan nga panginahanglan.  Makapahinumdum sa estorya sa kustomer nga nahingangha pagpalit niya’g kape kay nimahal na man ang presyo niini, kay matud pa usab sa tindera nimahal na ang presyo sa gasolina. Busa mihangyo ang customer nga, “Ayaw lang butangi’g gasolina ang kape Manang, aron dili momahal”. Pagkatoytoy!