Kinamingawan ang among landline
Pila ka tuig ang nilabay, gikumbinser mi sa among higala sa pagtaod og security system sa among bay. Aron nga bisan mobiyahe mi may magbantay gihapon. Kay ang kompaniya nga magtaog sa security system motubag man dayon sa alarma kon may mangahas pagsud sa among bay.
Aron mataod ang security system, kinahanglang duna mi landline. Uyon mi sa seguridad. Pero wa kakita og panginahanglan sa landline. Nipalit na lang kog CCTV. Nga mo-alerto sa among telepono kon may mosud sa bay. Duna pay speaker ug mikropono aron ikasulti ang bisita.
* * *
Hangtod nga naproblema ko sa SkyFiber. Nagsige og tiurok ang akong livestreaming sa SibyaTV! Bisan giunsa nako og pakitabang, wa motunhay ang akong mga sibya. Nakadawat kog daghang rekomendasyon sa mas maayong internet service provider (ISP). Gitun-an nako ang tanan. Maong makasulti na karon nimo nga way perpekto nga ISP.
Mag-agad sa imong nahimutangan. Sa kalidad sa kable nga ikutay sa among bay. Ug sa kapaspas nilang mosulbad kon maproblema ang koneksiyon. Human nangonsulta sa mas suhitong mga kaila, nagpataod kog PLDT Fibr. Nga, nakatag-an ka, may pakapin nga landline.
* * *
Gikuha dayon nakong numero sa landline. Ug gipahibawo sa tanan namong kaila. Apil nang akong higala nga nirekomendar og security system. Sud sa pila ka semana nga mingaw ang landline. Kausa ra nibagting. Nanawag ang paryente sa akong asawa aron pagpanungog nga wa siyang kasabot nganong nagpataod mig landline.
Posible kaha nga bisan ang among mga higala nga nag-apurang magpataod mig landline pila ka tuig ang nilabay wa na kakita sa panginahanglan? Wa na kong kasusi sa tubag hangtod nga niabot ang bagyong Odette.
* * *
Gahapon, gitawgan ko sa taga PLDT aron pahibaw-on nga gisugdan na nila og trabaho aron mabalik ang among internet connection. Ug landline. Wa pa motiurok ang akong livestreaming sa PLDT Fibr. Hangtod nga gipahagsa ni Odette ang tanang linya sa komunikasyon.
Samtang magpaabot sa pagbalik sa akong mga koneksiyon sa Sky Fiber ug PLDT Fibr, mosuway kog gamit sa Rocket SIM sa Smart kon makalahutay bag livestreaming sa SibyaTV! Kay akong DITO ug Globe kutob ra sa kamang. Pero wa gihapon koy ideya unsay kapuslanan kon mabalik nang among landline.
* * *
- Latest
