Hagit alang ni Chan

Taliwa sa krisis nga gisagubang sa daghang Oponganon mugna sa nagpadayong pandemya ug sa kadaot nga gihatag sa bagyong Odette, gipasuwabi sa mga opisyal sa dakbayan sa Lapu-Lapu ang ilang pamolitika sa way pagpakabana sa katawhan nga maoy naghatag sa ilang mandato.

Mahuman na ang buwan sa Enero apan hangtud karon walay annual budget ang dakbayan tungod sa kapakyas pagpasar sa konseho.

Gilumluman sa konseho nga gidominar sa oposisyon ang giduso ni Mayor Junard Chan nga P3.2 bilyones nga annual budget sa tuig 2022.

Ubos sa balaud, hangtud mapasar ang budget alang niining tuiga, gamiton sa dakbayan ang ilang budget sa miaging tuig.

Apan ang mahimo niining magasto mao lang ang kantidad nga gitagana alang sa pagpanuweldo sa mga kawani ug ang maintenance and other operating expenses (MOOE).

Dili malakip sa reenacted budget ang gahin alang sa mga proyekto ug uban pang importante nga kagastohan alang sa pagpalambo sa dakbayan. Si Chan mibasol sa mga konsehal nga kaalyado sa iyang kaatbang nga si Kongresista Paz Radaza tungod kay matud pa gihostage ang iyang budget aron madaot ang iyang administrasyon. Apan matud sa mga konsehal nga sakop sa mayoriya, sayop ni Chan kay iyang gidid-an ang mga department head nga motambong sa session sa konseho aron ilang masukit-sukit may labot sa budget.  Ambot kinsay nagtug-an nila sa tinuod.

Usa hinuon ka butang ang tataw—apektado ang mga Oponganon sa ilang karambola sa politika.

Gigamit sab ni nga lansis ni Chan nganong dili kuno niya mahimong gastuhon ang mga hinabang alang sa mga biktima sa bagyo tungod kay wala pa silay napasar nga budget. Mosugot si Chan o dili siya maoy dunay dakong tulobagon ngadto sa mga Oponganon.

Iyang responsibilidad ang pagsiguro nga mahatud sa katawhan ang batakang serbisyo ug hinabang gikan sa dakbayan bisan unsa pay sitwasyon sa politika. Dili mahimong hangtud sa hangtud gamitong rason ni Chan ang politika aron pagtabon sa iyang kapakyas pagtuman sa iyang obligasyon ug responsibilidad.

Angayang ipakita ni Chan sa mga Oponganon nga takos siya nga hatagan sa laing mandato alang sa ikaduhang termino unya sa Mayo bisan pa og way suporta gikan sa konseho. Mao ni hagit alang niya nga kun di ni niya mahimo, tingali angayang ikonsiderar ni Chan ang sayong pagretiro sa politika.