EDITORYAL - Way delicadeza?

Usa sa rason nganong pakyas ang Pilipinas sa pagkab-ot sa political maturity mao ang kamatuoran nga kadtong angay untang mag-amoma ug manalipod niini mao na hinuon nakalapas sa mga prinsipyo niini.

Sukad pa kaniadto, ato nang nakita nga kanunay nagyagaw ang sistema sa atong politika sa atong nasud. Kini tungod usab sa rason nga daghan sa atong mga political leaders ang walay klaro sa ilang baroganan, ilabina panahon sa piniliay.

Gani, ning umaabot nga eleksiyon, uso na usab kining kinaiya nga palingpaling sa atong mga kandidato. Sama sa nahitabo karon sa lineup ni presidential aspirant Sen. Panfilo Lacson ug vice presidential candidate and Senate President Tito Sotto.

Adunay unom ka miyembro sa Nationalist Peoples Coalition o NPC ang modagan alang sa nasudnong mga posisyon karong Mayo. Sila naglangkob nilang Sotto ug Gobernador Chiz Escudero, Rep. Loren Legarda, Sen. Win Gatchalian, JV Ejercito ug Herbert Bautista nga pulos nagpapili pagka senador. Ang lima ka mga kandidato pagka-senador nalakip sa Lacson–Sotto ticket. Apan bisan pa man niin, adunay pipila kanila ang mora’g dili pa kontento ug nanimpalad sa ubang partido.

Sama pananglit ni Senador Gatchailan kinsa ato nang nahibaw-an nga miiskerda dili pa lamang dugay ngadto sa grupo ni Davao City Mayor Sara Duterte aron pagdani sa mayor alang sa posible nila nga tandem bisan kon sakop pa gihapon ang senador sa NPC.

Sa laing bahin, si Kanhi Quezon City Mayor Herbert Bautista misandig kang Sotto aron pagpatabang niini nga mahahimong sakop NPC kaniadtong 2020. Milampos gayud si Bautista sa iyang lakang bisan sa mga legal problem nga giatubang niini.

Sa pagkakaron, busy sila si Gatchalian ug Bautista sa ilang kandidatura uban sa UniTeam ni kanhi senador Bongbong Marcos ug Mayor Sara Duterte bisan pa man kon pabilin pa silang mga miyembro sa NPC.

Ania dinhi ang dakong problema. Angay lamang nga bation og kaulaw ug kaikog si Gatchalian ug Baustista sa ilang partido nga NPC tungod sa ilang pagpasilong ug laing grupo. Wala man siguro nagkulang ang NPC pagsuporta kanila isip mga lehitimong miyembro niini.

Adunay politikanhong panultihon sa Tinagalog nga nagkanayon: “Namamangka sa dalawang ilog.” Tukma kini nga diskripsiyon kang Gatchalian ug Bautista.

Ug kon aduna pa silay gamay nga delicadeza, mas labing maayo nga mo-resign na lamang sila gikan sa NPC.