Salamat MCWD

Mahinamon na kaayo ang mga lumolupyo sa mga upland barangay sa Cebu City north district kay karong Hulyo, moagas na kanunay ang ilang mga gripo.

Nagpadayon ang pagtrabaho sa gitawag og Lahug Bulk Water Supply Project, usa kini ka proyekto nga pagkuha og tubig gikan sa Barangay Lusaran ug dad-on dinhi sa siyudad.

Gituyo gyud nga ang dagkong mga tubo sa tubig anaa gipaagi sa bukirang mga barangay sama sa Talamban, Pit-os, Pulangbato ug Busay, aron nga makatubig na ang nagpuyo niining mga dapita.

Ako kining gihisgotan kay daghan kaayong nagpangutana kanako, ilabi na sa mga nagpuyo diri sa bukid. Apil nga makabenepisyo niini mao ang mga nagpuyo sa ibabaw nga bahin sa Barangay Apas, Lahug ug Banilad.

Paabota lang ninyo ang pahibawo sa MCWD kon kanus-a kamo mo-apply aron kataoran mo daan og koneksiyon aron moagas na ang tubig diha sa inyong panimalay.

Pagka karon gani, bisan og wa pa ang maong proyekto, moagas na man ang tubig diri sa among gipuy-an sa bukid kada kaadlawon.

Kini maoy hinungdan nga magpasalamat gyud ko kanunay ni kanhi Cebu City Councilor Joey Daluz III nga maoy chairman sa MCWD kay maayo kaayo niyang pagkadumala ang water district.

Apil sa akong pasalamatan mao si MCWD General Manager Stephen Yee, ug sila si Engr. Edgar Ortega, Edgar Donoso ug Michael Diola nga maoy nagdumala sa water distribution.

* * *

Dinhi sa Cebu City, daghan gyud kaayo ang nagpaabot nga makadawat sa gisaad nga P5,000 para sa mga tag-iya og panimalay nga naguba atol sa pag-igo sa bagyong Odette.

Apan ambot, kapin na man sa usa ka buwan gikan sa pag-igo sa bagyo, wa pa gyud makadawat ang kadaghanan.

Nabalaka ko nga basin og mahutdan na og kwarta, unya ang tinuod gyud nga nagub-an og balay dili na makadawat.

Unsaon, giapil man sa paglista bisan kadtong mga wa gyud makasinati og kadaut sa bagyo. Ang kadaot nga ilang naangkon mao nga naukab ang atop sa kasilyas kay dunot na man daan.

Kon ilakip gud nga hatagan kadtong wa gyud maguba ang kabalayan, dili na maato paghatag kadtong mga tinuod gyud nga nagub-an, ug masaway na hinoon ang kagamhanan.

Mao kana ang akong nabalak-an nga basin og makadaot sa tinguha ni Mayor Michael Rama nga magpapili pagka mayor dinhi sa siyudad kon ang paghatag sa tag P5,000 nga tabang dili madawat sa mga tinuod gyud nga nagub-an og panimalay.

Maayong ayuhon kini niya sa paghunahuna kay basin og dunay gihimo sa iyang mga sinaligan nga makadaot na hinoon kaniya.