Gibadlong sa Malacañang

Napalaw ang tinguha ni Department of Transportation (DOTr) Secretary Arthur Tugade nga dili pasakyon sa mga public transport kadtong wa pa mabakunahe.

Bisan si Presidente Duterte wa makauyon sa maong pamaagi ni Tugade, nga unang gisaway nila ni Senador Ping Lacson ug Senate President Tito Sotto.

Gibalikas si Tugade sa mga tawo nga wa pa mabakunahi kay dihang gipatuman na ang iyang kamandoan, kaliboan ka trabahador ang wa makasakay paingon sa ilang trabahoan ug pauli sa ilang kabalayan.

Husto kaayo ang sugyot ni Senador Sotto nga ang DOTr magtudlo og mga sakyanan nga ang pasakyon kadto ra nga mga wa pa mabakunahi, dili sila isagol sa mga bakunado na.

Ang mando sa Malaca?ang nga dili usa ipatuman ang maong kamandoan ni Tugade nga klaro kaayong gidalidali ra sa paghimo ug makadaot hinoon kang Duterte.

* * *

Nindot ang gihimo sa kadagkoan sa Land Transportation Office (LTO) nga gilugwayan nila og tulo ka buwan ang validity period sa mga lisensya nga mi-expire dinhi sa Central Visayas.

Tungod sa kahinay sa internet connections sa mga opisina sa LTO, ingon man daghang kawani nila ang natakboyan og COVID-19, hinay ang pag-process sa renewal sa mga lisensya.

Tukma kaayo ang gihimo sa LTO nga gilugwayan ang deadline sa validity kay dili man sala sa mga driver nga dugay sila nga nakapa-renew sa ilang lisensiya.

* * *

Angay lang gyud nga estriktohon ang pagpanakop sa mga malapason sa curfew kay kon dili kini ayuhon sa pagpatuman, basin og ang kinabag-ang katawhan dili na usab motuman.

Ang uban mihimo’g mga pinilisopo nga komentaryo. Nganong mag-curfew man gyud kuno, anha ba kuno sa alas 11 sa gabii hangtud sa alas 4 sa kadlawon motakboy ang virus?

Ang wa nila mahunahuna nga sa mga imnanan, ilabi na kon magkalawom na ang kagabhion ug mangahubog na, nagdikitay na ug wa na ang social distancing.

Resulta, kon ang usa ka tawo dunay coronavirus, o kaha laing klase sa variants, magtinakdanay na dayon ug dugang kini nga problema sa kagamhanan.

 * * *

May mibalita kanako nga daghang kawani sa usa ka dakong kompaniya diha sa Mabolo napositibo sa coronavirus. Ang usa kanila misugilon nga gipang-swab sila, ug daghan ang napositibo.

Paniid nako, ingon niini ang sitwasyon karon human sa bagyo nga Odette. Ambot og tungod ba kaha sa panahon, o kaha sa hangin.

Gikuyawan ko nga basin og ang ubos ug sip-on, nga nagdala og hilanat, nakapanakod kini gikan sa hangin nga atong mahanggab.

Tambag nako, ayaw gyud mo padaog sa virus. Lihok gyud og pasingot, ayaw sige’g higda kay manakit ang imong kalawasan ug misiaw ang virus.