Dugang palas-onon

Dili momenus sa 56 ka pribadong eskewlahan sa nasud ang gikatakdang mopasaka na usab sa ilang tuition fee sa Academic Year 2021-2022 human aprobahi sa Commission on Higher Education ang ilang aplikasyon.  Makalibog ang maong pagtugot sa Ched tungod kay wala pa man unta’y halapad nga face-to-face classes.  Dugang na usab kini’ng palas-onon sa mga ginikanan.  Apan igo na lang ang mga ginikanan nga “moduko aron magpaalot” alang sa edukasyon sa mga anak.  Kay ginaingon man nga “Kon dili ka maantigo mosakripisyo alang sa imong gusto, ang imo unyang gusto maoy mahimong sakripisyo.”  Ginhawa Delfin!

Pagpasagad sa kagamhanan

Namahayag si Bise Presidente Robredo nga ang pandemya nga dala sa coronavirus nagbulgar sa mga kasaypanan sa atong healthcare system kay nasuta nga naghinobra ang atong pagpasagad sulod sa daghang katuigan.  Tingale, alang sa Bise Presidente, karon lang nila nasayran ang maong pagpasagad.  Apan alang sa katawhan, nasinati na nila kini sa matag adlaw bisan sa wala pa ang pandemya.  Maayo na lang kay giangkon na sa kagamhanan ang ilang pagpasagad aron dili na kini padak-on sa uban.  Ginaingon usab nga “Ang dili pag-angkon sa sayop, naghimo na hinoon og laing dakong sayop.” Paleho la!

Hain ang tubig?

Dili na modawat si Mayor Michael Rama og mga pasumangil sa kapakyas sa MCWD sa pagpaagas sa tubig sa matag balay.  Alang sa mayor, kinahanglan mahunong na ang paglinya sa katawhan aron lang makasalod og tubig.  Gilantaw sa uban nga pamolitika ang pamahayag sa mayor apan gipadayag usab niini ang kasilo sa katawhan batok sa MCWD.  Kay ginaingon baya nga “Ang hingpit ug matinud-anon nga pagpadayag sa hunahuna, usa ka matang sa pagpangalagad sa katawhan.”  Paagasa na intawon!

Lunod, impas!

Giawhag ni Presidente Duterte ang mga Katoliko sa pag-ampo alang sa pagpahi-uli sa nasud ug sa ka-ayohan sa katawhan sa COVID-19 atol sa kasaulogan sa Pista sa Itom nga Nazareno.  Hagbay ra man tingale nga nagsige’g ampo ang katawhan.   Apan mopadayon lang gihapon kita kay ginaingon man nga “Aron makabarog ang atong nasud, kinahanglan maantigo una kita’ng moluhod.”   Mag-ampo kita nga lugwayan pa ang atong pailob. Sa malisod nato’ng kahimtang karon, daw nagsakay kita’g barko nga hapit na malunod. Sama unya sa nguhô, basin makasangpit kita sa pag-ingon “Lunod, Impas (Oh Lord, Help Us).” Pagkatoytoy!

Hungit samtang naglibog

Nanawagan si Senador Manny Pacquiao sa mga hingtungdan’g ahensya sa kagamhananan nga ihunong na ang kamandoan nga maghiktin sa panglihok-lihok niadtong wala pa mabakunahi.  Alang sa senador, walay basehan ang maong kamanduan. Samtang nagkabangi pa ang kagamhanan niining maong hisgutanan, nagpunsisok usab ang katawhan sa lugar nga gitakda aron magpabakuna.  Makapahinumdom sa akong amigo nga naglibog kon mokaon pa ba o dili na.  Samtang naglibog pa siya, padayon ang iyang paghungit busa sa higayon nga nakadesider na, labihan na niya’ng busoga.  Padayon lang!