Nahadlok sa gaba sa MCWD
Ang kinadak-ang problema sa liderato sa Metro Cebu Water District (MCWD) di ang kakuwang og pagsalig ni Cebu City Mayor Mike Rama nila. Kon dili ang ka wa nilay nahimo sa pagpalambo sa suplay sa tubig.
Gitudlo sila sa katungdanan taliwa sa dinungan nga pagpadayag og kahimangod sa mga politiko sa kapakyas sa MCWD sa paghatod og tubig sa kinabag-an sa kabalayan sa Metro Cebu.
Gipasanginlan ang kanhi mga sakop sa Board of Directors sa MCWD nga nangiyugpos lang atubangan sa kauhaw sa kinabag-an sa mga konsumidor.
* * *
Puno sa pasalig ang pagbanos sa bag-ong mga tagduma sa MCWD: Ipatuman nila ang dugay nang natanggong nga mga plano sa pagdugang sa suplay sa tubig.
Sama sa pagtukod sa high dam sa suba sa Mananga sa utlanan sa Talisay City ug Cebu City. Ug sa pagpabarug og higanteng desalination plants nga mohimong tab-ang sa dagat aron magamit sa kabalayan.
Pero naabtan na lang sa bagyong Odette way natuman sa bisan usa na lang sa ilang mga pasalig. Nisamot ang kakuwang sa tubig dayong abot sa katalagman.
* * *
Duha ang kumon nga paghulagway sa mga sakop karon sa MCWD Board: Pulos sila tinudlo ni anhing Mayor Edgar Labella; ug pulos sila way nakamaohan sa tubig.
Pipila nila gipasanginlan nga nigamit sa ilang katungdanan sa pamolitika. Gani, gidudahan nga ang ka way salig ni Rama nanukad sa pagkalambigit sa pipila nila sa pasangil nga traydor ang mayor batok sa anhing mayor ug sa hulga nga suportahan nila ang laing kandidato pagka mayor.
* * *
Ang kinadak-ang kahadlok sa mga nagtungkawo karon sa gahom sa MCWD mao ang gaba. O ang posibilidad nga ang mga sirkumstansiya sa ilang pagkatudlo mao say moresulta sa ilang pagkataktak:
Nakalingkod sila sa katungdanan bisan wa pa mapupos ang mga termino sa ilang mga gipulihan, nga pulos tinudlo ni kanhi Mayor Tommy Osmena bisan wa pa sab mapupos ang mga termino sa mga nag-una nila; maong
May sukaranan ang ilang kahadlok nga mapulihan ra sab sa mga suod ni Rama o sa mayor nga modaog sa piniliay karong Mayo bisan di pa mapupos ang ilang mga termino.
* * *
- Latest
