Basta maoy nakaingon sa sunog kasohan gyud!

Ginaingon sa uban nga mas maayo pa mabahaan ang balay kay sa masunogan. Kay naa pay mapunit bahala og mabasa kay puwede pa man mabulad ug mauga kay sa sunog nga maugdaw ug maabo man gyud ang mga kabtangan kong lamyon na sa kalayo pero kong mahimong malikayan mas maayo nga wala gyud.

Ang kadanghag sa mga tawo ang kanunay gyud ang hinungdan sa sunog nga nahitabo ug igo nalang sa pagmahay sa higayon na nga mabiktima sa katalagman kay makalusot ra man kasagaran ang mga tawo o mulopyo nga maoy tinubdan sa sunog. Usahay adunay makulatahan apan kasagaran makalusot ra gyud. Lahi karon sa dakbayan sa Sugbo kay gitinuod na gyud sa Cebu City Fire office ang paggukod sa mga responsable sa sunog, tinuyo man o dili basta manubag gyud sa balaod.

Kamatuoran niini matod ni Chief Inspector Josephus Alburo, ang pangulo sa Cebu City Fire Office, nga upat na ka mga tawo ang ilang napakonbikto sa korte human napamatud-an nga guilty sa sunog nga nahitabo sa ilang dapit, samtang adunay laing 12 ang kasamtangan nga gihusay ang kaso.

Gipasabot sa opisyal sa BFP nga daghan kaayong mga kabtangan nga nausik, adunay mga kinabuhi nga nakalas, ug labaw sa tanan nausik usab ang kwarta gikan sa panudlanan sa kagamhanan nga gigamit isip pag ayudad sa mga nabiktima sa sunog.

Aron makita gyud sa mga tawo ang kaseryoso nila sa pagpakgang sa sunog kinahanglan nga ilang sampolan kadtong mga tawong danghag nga mao nakaingon sa miserableng kahimtang sa ubang mga tawo.

Wala kaayo mahatagi og highlight sa media ang legal nga aspeto kalabot sa paggukod sa BFP sa mga tawong anaa sa luyo sa sunog. Kadtong mga nagtuyo sa pagsunog given naman na nga kasohan og arson apan kadtong mga tag iya og balay nga maoy sinugdanan sa kalayo apil usab sa ilang gukdon pinaagi sa ipasakang kaso. Maayo kining lakang sa bombero aron makahigmata ang tanan nga angayan nga magmatngon dili lang tungod kay kasohan sila apan labaw sa tanan tungod ug alang sa tagsa tagsa ka kaluwasan.

Karon kay Pasko na adunay daghang hinungdan sa posibleng pagtumaw sa sunog kay daghan kaayo ang lutoluto. Busy kaayo ang kusina ug sa nagduol nga Pasko aduna na usay mogamit og mga pabuto. Mao nang gikinahanglan nga mag amping gyud kay ulahi na ang tanan kong dili magbantay.