Fully vaccinated ray unang makadawat?
Mipagawas og kamandoan si Cebu City Mayor Michael ‘Mike’ Rama nga ipanghatag na ang P3K-cash assistance para sa senior citizens didto sa covered court sa matag barangay ning umaabot Disyembre 18.
Pero adunay kondisiyon: kadto lang fully vaccinated seniors maoy unang hatagan.
Unya ang naka-first doze, sa mga sunod nang adlaw. Ug ang wala pa magpabakuna, wala pa hisgoti kanus-a makadawat.
Gani, ang kagamhanan sa siyudad mopadala mag health workers team ngadto sa kabalayan alang sa massive vaccination.
Buwahan, ang mga unvaccinated senior ma-indeksiyonan na.
Sa ato pa, dili na seniors ang maghago’g adto sa gipangkatag nga RESBAKUNA sites. Kon dili, ang bakuna na mismo maoy miduol sa mga tigulang.
Siyaro na ma usab, kon silang gahi, dili madutlag kaikog ug kaluoy ning puwerting paningkamot sa atong gobiyerno nga tanang seniors mabakunahan na.
Ang tambal nga atong gipangayo sa Kahitas-an, pinaagi sa Oratio Imperata, ania na. Unya, nganong ato man kining isalikway? Hinumdomi.
Walay gikan sa Ginoo nga dili makaayo nato.
Busa, seniors, patuslok na! Dili ba mo maluoy sa mga gagmay pa natong apo ug sa tanang na-fully vaccinated, nga tungod lang sa kahadlokan ninyong magpa-inject, dili nato makab-ot ang herd immunity?
Ang local government units ra ba, sama ni Mayor Rama pasilotan ni Pres. Duterte kon hinay o diyotay ray mabakunahan ning dakbayan nga iyang gipangamahanan.
Giorderan sa pangulo si Department of the Interior and Local Government Secretary Eduardo Año nga ipaandam daan ang silot nga angayng ipahamtang ngadto sa mga mayor o local executives nga mapakyas.
Nga sa ato pa, kon daghan gihapon ang dili magpabakuna, delikadog masilotan atong mayor. Ug kitang seniors, kinsa tigdawatag cash assistance gikan sa city hall, dili ba ta makatabang niya niining panahona?
Pagpabakuna ray iyang gipangayo. Di ba ta makahatag niya niini isip pinaskohan? Unta, dili ikahiubos sa mga senior kon kadto lang una ang mga nabakunahan ang makadawat og
P3K-cash assistance.
Total, kamo man ang mipili nga dili gyod magpabakuna.
Hinuon, kon may ikapresentar ang senior nga medical certificate, diin nagpahibalo nga dili siya puwedeng bakunahan og COVID-19 vaccine, tingale balidong rason kini nga makapaluag sa hugot kamandoan ni Mayor Mike. Sulayi!
- Latest