Tigbakay

Bisan sa pandemiya walay hunong ang tigbakay. Ato ning nasayran sa mga balita nga nanggawas sa media.

Niadtong adlaw nga Domingo alas 11:00 sa buntag, nadakpan sa mga sakop sa Provincial Intelligence Unit (PIU) sa Provincial Police Office sa Bohol nga gipangulohan ni Police Lt. Col. John Karren Escober ug Bien Unido, Bohol police nga gipangulohan ni Police Lt. Margarito Cagoco ang Bise Mayor sa lungsod sa Bien Unido nga si Ramon Arcenal, Barangay Kapitan sa Mandawa nga si Patrocinio “Pat” Boniel ug ang iyang konsehal nga si Jovy Boniel.

Gawas sa nahisgotang mga opisyal sa lungsod ug barangsay, lain pang 22 ka mga tawo ang nadakpan atol sa gipahigayon nga pagpangronda sa gipasiugdahan nga tigbakay sa Barangay Mandawa, Bien Unido, Bohol. Lain pang 5 nga nakasibat apan nailhan hinungdan nga giapil sila sa pagpasaka og kaso nga kalapasan sa PD1602 o illegal gambling.

Nganong gidakop man ang tigbakay ug nganong gitugotan man ang online sabong ug buwang sa mga buwangan? Dili ba mao ra man ning klaseha sa sugal sa manok? Labok sa manok? Kun gitugotan sa gobiyerno ang online sabong ug buwang sa mga buwangan, nganong dili man tugotan ang tigbakay?

Ang gobiyerno walay moral ascendancy nga mamadlong ug manakop sa tigbakay ug sa bisan unsang matang sa sugal tungod kay mao kini ang numero uno ug pinakadako nga sugarol dinhi sa nasud.

Kun buot gyod nga wagtangon sa gobiyernno ang sugal pinaagi sa pagpadakop niini, di ang gobiyerno ang unang moundang sa pagpadagan og sugal pinaagi sa pagwagtang sa tanang matang sa sugal nga gipadagan pinaagi sa pagtugot sa Philippine Amusement and Gaming Corporation o PAGCOR.

Hangtod dili moundang ang gobiyerno sa iyang pagkasugarol dili gyod ta makapaabot nga mawagtang ang sugal dinhi sa nasud.