Nagbasol kay nasakpan

Gipanghimakak ni Mohit Dargani, opisyal sa Pharmally Corporation, nga siya ug ang iyang igsoon buot mo-eskapo sa imbestigasyon sa Senado.  Nasayran nga gidakop ang managsoong Dargani samtang padulong na mosakay sa chartered plane paingon sa Malaysia.  Mahimong biktima ang Pharmally sa pamolitika.  Apan nagtuo usab ang taga-Pharmally nga wala sila’y dautan nga nabuhat. Ginaingon nga “Ang kinaiya sa tawo maumol sa iyang pagtoo.  Kon unsa ang iyang gituohan, mao usab siya”.  Apan kwidawo usab kay adunay mga tawo nga nagbasol dili tungod sa ilang nabuhat nga sala kon dili tungod kay nasakpan sila sa ilang gibuhat.  Fezteleern!

Pangandoy sa inahan

Giangkon sa DepEd nga kinahanglan ang dugang kalihokan alang sa capability-building sa mga ginikanan tungod kay aduna sila’y dakong kaakohan alang sa kalampusan sa pagkat-on sa mga tinun-an. Baniog nga dili ang mga tinun-an mismo, kon dili ang mga ginikanan ra ang motubag sa mga pangutana sa modules sa mga tinun-an.  Makapahinumdom sa estorya bahin sa duha ka inahan nga nagsabot nga tarongon jud nila pagtubag ang mga modules sa ilang anak.  Rason pa nila: “Pangandoy baya gyud nato nga mahimong nurse ug kapitan sa barko ang atong mga anak”.  Hala no!

Hapit mapilde

Atol sa iyang pakigpulong sa 13th Asia-Europe Meeting Summit (ASEM), gipahimug-atan ni Presidente Duterte nga ang balaod nga UNCLOS mao lamang ang madawat nga basehan sa kalinaw diha sa South China Sea uban sa pag-ingon nga walay tinuod nga kalinaw kon “yatakan lang sa mga kusgan ang mga mahuyang”. Lawod ang gintang sa pwersa ug ekonomiya sa atong nasud itandi sa China.  Makapahinumdom hinoon sa asoy sa akong higala nga nagkanayon, “Maayo gyud ang among kontra, pildi gud mi dayon sa first game.  Tarongon bitaw namo’g duwa sa second game, dah, hapit lagi sila mapilde.”  Pagkatoytoy!

Daug sa asawa

Gipahimug-atan ni Bise Presidente Robredo ang panginahanglan sa usa ka manggiloy-on nga lider.  Dugang pa niya, ang paghupot og katungdanan kanhi sa kagamhanan dili igo nga basehan sa abilidad sa usa ka maayo’ng pangulo.  Tataw nga may gipasabot ang Bise Presidente ni’ng iyang panahom.  Apan malisod pangitaon ang maong matang sa lider kay segun sa datos, “usa lamang sa matag usa ka libo ka tawo ang matawag nga pangulo sa mga kalalakin-an - kay ang 999 kanila, mosunod gayod sa kababayen-an”.  Daghan ang miyembro sa NEDA kon Nagkahiusang Empleyado nga Daug sa Asawa.  Madahaan!

Angay ba’ng tamdon?

Ubos sa “new normal” guidelines sa pagpangampanya, ginadili na ang bisan unsang matang sa physical contact sama sa paglamano, pagginaksanay, panaghalok, pag-selfie ug uban pa’ng susamang kalihokan.  Daw virtual na diay ang paagi sa pagpangampanya, busa kadudahan ang ka-epektibo sa maong lagda.  Ginaingon nga “kon buot kita nga tamdon ug respetohan ang balaod, himoa una’ng angayan sa pagtamod ug pag-respeto ang maong balaod”. Apan kon buot kita nga mahanaw ang dili maayo’ng balaod, ipatuman lang kini sa labing strikto nga pamaagi.  Isip-isip!