Balik sa gikamingawan nga tunghaan

Human sa halos duha ka tuig nga paghunong sa pisikal nga klase sa mga eskwelahan, nakabalik na gyud ang pipila nga napili isip pilot schools nga gitugotan nga makapahigayon og face-to-face classes.

Usa sa napili ang Cabagdalan Elementary School nga nahimutang sa remote barangay sa lungsod sa Balamban ning lalawigan sa Sugbo diin ako usab nga gibisita niadtong Lunes atol sa pagbukas sa klase.

Excited kaayo ang mga tinun-an, magtutudlo, ginikanan ug bisan ang mga baranggay officials mihangop gyud sa pagbalik sa face-to-face classes nga gisaulog nila kini.

Ang mga magtutudlo nagdala og mga balloons nga mi-welcome sa mga estudyante nga mora’g gikan sa halayong panaw nga nakabalik na sa tunghaan.

Apan higpit kaayo ang protocol nga gipatuman kay sa ganghaan pa lang adunay duha ka mga nurse gikan sa DepEd nga nag-asikaso sa mga tinun-an nga maghugas sa kamot, magkuha sa temperatora ug uban pa nga mga lagda sa pagtuman sa minimum health standard.

Samtang sa sulod sa mga classroom gibutangan usab og mga plastic barrier aron masegurong dili magkasikit ang mga tinon-an ug naa usay alcohol sa atubangan.

Gipangandaman usab nila ugaling naay maglain ang lawas sa mga tinun-an diin adunay special room nga gihimong isolation diin obserbahan ang tinun-an.

Inihap ang lihok o kontrolado ang kalihokan sa sulod sa eskwelahan nga dili mahimong magkaduolay ang mga tinun-an kay magduwa duwa sanglit closely monitored man sila sa maestra o maestro.

Gawas pa gamay ra ang gipangtugotan nga makaapil sa face to face, kadtong mga aduna lay parent consent. Busa segurado gyud nga dili makakiat ang mga bata, samtang ang mga ginikanan maghuwat usab sa gawas.

Ang mga ginikanan nga walay mabakunahi dili pud tugotan nga makasulod sa eskwelahan diin didto ra sila sa gawas magpaabot samtang ang mga vaccinated didto sa sulod sa campus.

Experimental pa kini nga proseso apan kong magmalamposon mamahimong mao kini ang sumbanan alang sa pagpabalik na sa hingpit sa face-to-face classes.

Ang mga ginikanan hilabihan ka lipay kay dili na sila magsakrispisyo pagkat-on sa module nga maoy ilang itudlp sa mga anak ug makahinultol na sila sa ilang trabaho.

Base sa akong nasaksihan maayo man nga masuwayan ang ingon niini nga paagi ilabi na kadtong mga dapit nga walay kaso sa COVID-19 sama sa Barangay Cabagdalan nga wala gyud ma-infect sukad sa pag-igo sa pandemic.

Hinaut nga smooth lang ang dagan sa face-to-face nga klase ug walay bata o magtutudlo nga mataptan sa virus.

Sa mga tinon-an welcome back to school, amping kanunay!