Human na’ng drama
Nahuman na ang salida ug drama pinaabot magpresidente ba o dili si Davao City Mayor Sara Duterte.
Kaniadtong Sabado, hingpit na siya miduso sa iyang certificate of candidacy isip kandidato pagka-bise presidente ubos sa partidong Lakas-CMD.
Wala na hinuon ko mahibulong niini tungod kay daan nang misibaw ang taho nga bise presidente gyud ang iyang daganan.
Nasilyohan ang sabot nga mag-tandem silang Bongbong Marcos ug Sara atol sa ilang pagduaw dinhi sa Sugbo.
Sigun sa akong tinubdan si Senador Imee Marcos ang igsuon ni Bongbong maoy nakakumbinsir ni Sara nga mamahimong bise sa iyang igsuon.
Atol sa maong higayon mihangyo si Sara nga dili ipahibawo ang nasabotan ug hatagan siya sa higayon nga maoy hingpit mopahibawo niini ngadto sa ilang mga supporters human siya makapananghid sa iyang inahan.
Nag-anam ka tin-aw ang maong posibilidad dihang miatras si Sara sa iyang kandidatura isip mayor sa Davao. Misamot dihang nibiya siya sa iyang partidong Hugpong ng Pagbabago ug nanumpa isip membro sa Lakas-CMD atubangan sa ig-agaw ni Bongbong nga si Kongresista Martin Romualdez.
Sa pagpanumpa ni Sara isip sakop sa Lakas-CMD nahibaw-an na daan sa mga tigpaniid sa politika nga magbise gyud siya ni Bongbong. Gawas sa mga supporters ni Sara, mas naguol ang kampo ni Bise Presidente Leni Robredo sa wala pagdayon ni Sara pagkapresidente.
Kini tungod kay mas makabintaha sila kun nidayon pa si Sara pagkapresidente ug nasayod ang kampo sa administrasyon niini.
Mas praktikal ni nga lakang tungod kay malikayan ang pagkabahin sa ilang mga dumadapig.
Nalipay sab ang kampo ni Senador Manny Pacquiao niini tungod kay malikayan sab ang pagkabahin sa boto sa Visayas ug Mindanao.
Mapugngan ni Pacquiao ang boto gikan sa Mindanao samtang ang Visayas mahimong mabahin tali nila ni Bongbong.
Si Leni, Isko Moreno ug Ping Lacson mag-ilog sab sa Luzon. Apan tungod sa gidaghanon sa masa nga mga botante nga posibling adto ni Pacquiao, makakibhang gihapon siya sa boto sa mga kandidato gikan sa Luzon.
- Latest