Mas hadlok kong walay bonus

Mahulog sa “dili pinugsanay apan walay balibaray” ang sitwasyon sa mga kawani sa Cebu City Hall diin nakadepende sa ilang desisyon kong magbakuna o dili ang P20,000 nga bonus.

Kong naay usa ka kawani nga dili mabakunahan maamong ang tanan busa kadtong mga empleyado nga hadlokan og bakuna murag mapugos nalang pastilan kay sila man ang basolon sa kinabag-an nga dili makadawat sa gikahinaman nga 20 mil pesos.

Gani aron madasig ug wala nay rason nga dili makapabakuna ang mga empleyado gihimo gyud ang duha ka adlaw nga special vaccination sulod mismo sa Legislative building sa City Hall.

Sagad sa akong napangutana nganong dugay sila nagpabakuna, ang ilang tubag nga mahadlok gyud kuno sila sa dagum ug sa bakuna mismo.

Dihang gipangutana kon nganong nakombinser nga nagbakuna klaro kaayo ang tubag nga mao ang kahadlok nila nga dili makadawat og bonus ug labaw sa tanan nga sila ang makaamong sa ilang mga kauban.

Hinuon dunay niingon nga naka-realized sila nga gikinahanglan na nga magpabakuna tungod ug alang sa ilang pamilya busa gipadaplin nila ang ilang kahadlok ug kabalaka.

Base sa akong obserbasyon sa special vaccination sa mga City Hall employees mora’g gilangaw man sa kamingaw gani gilaay ang mga vaccinators kay wala man silay giatiman.

Bisan gihungit na halos ang bakuna aduna gihapoy wala pa kaayo makombinser nila, ambot lang kong madala ba sa kahadlok nga walay madawat nga  bonus.

Bitaw hugot kaayo ang tinguha sa City Hall nga makab-ot ang target nga herd immunity maong gihimo nila ang tanan nga pagkabig sa mga tawo nga magpabakuna ug ang epektibo nga kampanya nga magsugod mismo sa ilang tugkaran diin ang tanang mga kawani ug opisyal ang mabakunahan.

Magsige sila og awhag sa mga tawo unya wala sila makapasugot mismo sa ilang empleyado nga magpabakuna dili maayong ehemplo.

Karon ma-hostage man ang mga kawani apan wala silay mahimo kong ingon niini ang gipangayo nga tugbang sa gobierno sa ihatag nga bonus.

Hinoon basin aduna pay kausaban niini nga posibleng kada departamento nalang kadtong department nga 100% vaccinated maoy mahatagan.

Moabot sa 85% na diay sa mga City Hall employees ang bakunado ug anaa pay 15% nga gihuwat. Dakodako pa ni kong hunahunaon. Sa mga kawani unsa man ang inyong pilion bakuna o kwarta?