Tomas moatras?

Samtang nagkakulbahinam ang kalamboan sa nasudnong politika nunot sa pag-atras ni Davao City Mayor Sara Duterte sa iyang reelection bid ug sa posibilidad nga mosanong gyud siya sa panawagan nga modagan pagkapresidente, hilom sab nga naglami ang kalamboan sa politika sa habagatang distrito sa dakbayan sa Sugbo.

Luyo sa kasayuran sa kadaghanan, wala pa gyud diay hingpit maresolber ang kontrobersiya sulod sa Bando Osmeña Pundok Kauswagan (BOPK) mahitungod sa pagpili sa ilang mga kandidato.

Kun mahinumduman init ug emosyonal ang nahimong proseso sa grupo pagpili kinsay ilang mamahimong kandidato pagkamayor ug bise mayor sa umaabot nga eleksiyon tungod sa panag-ilog nilang Kongresista Bebot Abellanosa ug ABC President Franklyn Ong.

Si Bebot gusto gyud untang magmayor samtang si Ong maoy iyang bise. Apan napugos si Bebot pagsibog dihang nasayod nga siya maoy moabaga sa gasto sa tanang kandidato.

Nahukman sa BOPK nga si kanhi konsehal Margot Osmeña maoy himoong standard bearer hinungdan sa kontrobersiya tungod kay si Bebot nakigtigi ni Ong alang sa pagkabise mayor.

Human sa init ug emosyonal nga proseso, napildi si Bebot ug si Ong maoy nahukman sa BOPK nga mamahimong runningmate ni Margot. Samtang si Bebot maoy magsilbi nga campaign manager sa partido.

Nahuman na ang ilang mga kandidato pagduso sa certificate of candidacy apan gikatahong wala gyud makontento si Bebot sa nahimong desisyon sa ilang grupo.

Karon hugtanon niyang giduso nga ang iyang anak nga si Jose "Bebot" Jr. maoy himoong kandidato sa partido pagkakongresista sa South District.

Ug aron mahilom si Bebot gikatahong miuyon na si Tommy nga maoy mosakprisyo ug moatras sa iyang kandidatura pagkakongresista. Ang anak ni Bebot maoy magsilbi niyang substitute.

Kun tinuod ang kasayuran nga akong nadawat, dili ni makatabang sa BOPK. Way bawot ang batan-on ug wa pay kasinatian sa politika batok sa mas eksperensiyado ug hanasna nga si Konsehal Edu Rama.

Dako hinuon ang posibilidad nga kun modayon og atras si Tommy, madasig si Totol Batuhan pagsalmot og balik sa politika.

Dili pa awahi alang ni Batuhan tungod kay mahimo pa siyang mo substitute sa miatras nga kandidato sa National Unity Party (NUP) nga si Michael Bantasan.

Samtang didto sa kaulohan, inanay na nga natubag ang mga pangutana modagan ba og nasudnong pwesto si Sara.

Sa iyang pag-atras sa pagpasubli pagkamayor sa Davao, gitubag ni Sara ang dugay na nga pangutana.

Apan sa pangutana magpresidente ba siya o magbisepresidente, kini matubag gikan karon hangtud sa Lunes, ang katapusang adlaw sa substitution.

Ang labing siguro hinuon alang niya mao ang pagkabise presidente.