Sunod-sunod sa agos

Gitun-an karon sa kagamhanan unsaon pagpatuman ang pinugos nga pagpamakuna batok COVID-19 aron mapatas-an ang talaan sa mga nabakunahan na.  Sumala sa datos, kadtong wala mabakunahi maoy nagrabehan kon mataptan sa COVID-19.  Bisan kon aduna na’y balaod alang sa pinugos nga pagpamakuna dili maseguro nga motuman na ang tanan. Hayan aduna gihapo’y mosukwahi.  Daghang kanato ang nagtamod sa panultihon, “Ang kaatbang sa ka-isog dili ang katalaw, kon dili ang pag-uyon-uyon lang.  Bisan gani ang patay nga isda, mosunod man sa agos sa tubig”.  Madahaan!

Santa Claus nga sikyu

Mipadayag sa iyang kahingawa si PNP Chief Police General Eleazar mahitungod sa mga security guards nga magsul-ob og sapot ni Santa Claus, atol unya sa kapaskohan samtang nagtakin og armas kay basin makahatag kini’g kalibog sa katawhan.  Angayan tingale nga ipunting ni Gen. Eleazar ang iyang atensiyon ngadto sa pagsantâ sa krimen nga sagad mosalga atol usab sa kapaskohan.  Panahom pa sa akong amigo, “mas maayo pa ang security guard nga nagsul-ob sa sinina ni Santa Claus apan padayon’g nagserbisyo, kay sa polis nga nagsul-ob sa uniporme, apan namerhuwesyo”.  Baya no!

Modagan kay nahagit

Matud pa ni Secretary Roque, nakakaplag siya’g kasibot nga modagan pagka-senador tungod kay dili siya makatugot nga ang mga ka-alyado sa mga “extremists” nga pundok, lakip na kadtong supak sa iyang nominasyon ngadto sa International Law Commission, mapili usab ngadto sa senado.  Pesonal na kaayo ang rason ni Secretary Roque ug dili na ang naandan nga pagpangalagad sa katawhan.  Mora’g may kamatuoran na ang panahom nga “Nagkahanap na ang pagtoo nga ang pagpangalagad sa publiko nagkinahanglan og tawo nga adunay maayo nga kinaiya”.  Saoonz!

Kasing-kasing sa irô

Mopahigayon og imbestigasyon ang buhatan sa Agriculture sa lungsod sa Asturias, Cebu human mokatap sa internet ang video nga naghulagway sa makalolooy nga kahimtamg sa mga irô.  Na-impound ang maong mga hayop human ipatuman sa lungsod ang Dog Care and Anti-Rabies Ordinance of 2010.  Gibangkong na.  Ang balaod nga may katuyoan unta sa pag-amoma ug pagpanalipod sa mga mananap mao na hinoon ang hinungdan sa ilang kaalautan tungod lang kay adunay nagpasagad sa ilang katungdanan.  Tinuod ang panultihon nga “Kon ang tawo aduna pa lang unta’y kasing-kasing sama sa irô, hapsay unta ang atong pamuyo”. Fezteleern!

Pa-iyakan vs. paluwagan

Tungod sa daghang mga reklamo sa kalapasan, mi-imponer ang SEC og moratorium sa pagpangrehistro sa mga bag-ong online lending platforms (OLPs) sa mga financing ug lending companies.  Ang pagkuyanap sa mga lending companies nagmatuod sa pagya nga “wa magsalig ang empleyado sa sweldo kon dili sa utang”.  Gani, nagkompetensya ang gobyerno ug pribadong sektor sa pagpautang. Apan daghan ang rekisitos sa gobyerno mao nga modangop na lang ang nanginahanglan ngadto sa mga “Bombay” bisan kon naghinobra na ang interest nga ipatong.  Sa gobyerno kon mangutang “pa-iyakan”; sa Bombay, “paluwagan”. Paleho la!