Kinsay unang casualty?

Sa unang higayon niatubang sa media ang pamilya ni Mayor Edgardo Labella aron ipahibawo ang kahimtang sa iyang panglawas human ni nalandig pagbalik sa tambalanan tungod sa pneumonia. Ug sa una sab nga higayon giangkon sa asawa ug duha niya ka mga anak nga dunay prostate cancer ang mayor ug naoperahan ni niadto pang tuig 2012 apan giingong luwas na siya sa maong balatian.

Wala na mohatag og dugang detalye ang pamilya, nagdumili sab sila pagdawat og mga pangutana sa media. Igo lang nilang gibasa ang inandam nga pamahayag ug wala na motubag sa mga pangutana.

Sigun sa pamilya ilang gidala pagbalik ang mayor sa tambalanan ug nasulod gyud kini sa Intensive Care Unit (ICU). Apan gikatahong nabalhin na ni sa regular nga private room ug nagpadayon sa iyang recovery.

Padayon silang nanawagan og pag-ampo sa publiko alang sa dali nga kaayohan sa mayor. Apan bisan sa iyang kahimtang, matud sa pamilya, dili moluwat ang mayor sa iyang katungdanan.

Ambot kabubut-on ba gyud ni sa mayor o sa mga tawong hakog nga nahadlok matangtang sa ilang pwesto kun moluwat ang mayor sa iyang katungdanan. Ang pamilya maoy labaw’ng nasayod sa tinuod nga kahimtang sa panglawas sa mayor. Mahimong wala nila itug-an ang tanan sa publiko apan dili matago ang kaseryoso sa sitwasyon.

Ang pag-leave ni Labella nga walay pihong petsa kanus-a mobalik pagreport sa trabaho nagpasabot nga dili ti-aw ang iyang kahimtang. Way kapuslanan magpabilin siya sa katungdanan bisan dili na makahimo pagtuman sa iyang responsibilidad.

Dili ni makiangayon alang niya ug sa katawhan sa dakbayan sa Sugbo.  

Mas makatabang tingali alang sa iyang pagpaalim kun hingpit niyang talikdan ang iyang responsibilidad sa dakbayan ug maoy atimanon ang iyang panglawas. Dili sab maayo ang stress alang sa mayor tungod sa iyang kahimtang.

Gawas pa dili na siyang kapugong ni acting Mayor Michael Rama kun tangtangon iyang mga sinaligan sa City Hall.

Sigun sa Local Government Code duna nay hingpit nga gahom sa mayor si Rama human sa 30 ka adlaw nga wala mobalik si Labella pag-asumir sa iyang pwesto.

Sa laktud bisan og acting capacity si Rama apan ang iyang gahom sama na sa regular nga mayor.

Nagpasabot ni nga mahimo na siyang mopirma og mga kontrata ug mo-hire ug manaktak og mga empleyado.

Mahimo na gani kaayo nga ilisan ni Rama ang mga department heads lakip na ang city administrator nga si Floro Casas Jr.

Sanglit nagsing-abot ang piniliay, dili na ko mahibulong kon ang sunod nga mga lakang ni Rama mao ang paghimo og loyalty check sa mga department heads. Kinsa kaha ang unang mamahimong casualty?