Kalagkalag nga wa diha

Kalagkalag karon apan mingaw pa sa tirana ang mga sementeryo tibuok nasud kay lagi sirado gumikan sa mando sa DILG kansang tuyo mao ang pagpugong sa panagtapok sa katawhan taliwala niining pandemiya sa coronavirus.

Sama sa niaging tuig, nakadesider ang otoridad nga sirad-an ang tanang sementeryo aron paglikay sa pagkuyanap sa COVID-19. Ug mao usab karong tuiga, gidid-an ang si bisan kinsa nga makasulod sa mga sam-ang.

I’m sure kadaghanan kanato nakabisita na sa ilang mga patay sa niaging mga adlaw kay dili man lagi sila makasulod sa mga sementeryo karon ug ugma. Kabahin na kana sa atong tradisyon sulod sa gatusan na ka katuigan.

Hinuon kadtong mga local government unit nga dili mosunod sa mando sa DILG pagsira sa mga sementeryo karon ug ugma, sigurado nga ulanon gayud sila og mga kaso sa maong ahensiya.

* * *

Sa makausa pa mitiglom na usab ang mga kaso sa COVID-19 sa dakbayan sa Sugbo ug kinatibuk-ang lalawigan human sa pipila ka bulan nga pagsulbong niini nga giingon sa otoridad nga third wave sa pandemiya dinhi sa Pilipinas.

Nanghinaut lamang ang tanan nga unta padayon na gayud ang paglurang sa mga kaso sa maong makamatay nga sakit aron sa ingon mabalik na ang tanan sa normal, ilabina ang panginabuhian sa matag usa ug ang ekonomiya sa kinatibuk-an.

Gani, niining maong kalamboan, gitugotan na sa nasyonal nga kagamhanan ang paggawas sa mga bata. Kini human sa halos duha ka tuig nga pagkatanggong kanila sa ilang panimalay gumikan sa pandemiya.

Dinhi sa Sugbo, abli na ang mga establisimento sama sa sinehan ug uban pa. Sugdan na usab sa dili madugay ang pagbalik sa face-to-face classes sa mga tulonghaan sa mga lugar nga wala nay mga kaso sa coronavirus disease.