Pahibalo sa tanang mga kalag

Dunay post sa Facebook nga nagkanayon:

PAHIBALO ALANG SA TANANG MGA KALAG

“Sanglit gidili man pagduaw kaninyo ning mga adlawa (Nov. 1 ug 2) kamo na lang ang gihangyo nga maoy moduaw sa tagsatagsa ka pamilya nga inyong gibiyaan.

Daghang Salamat! Kay mas maayo pa ang molansaray nga naghimo og pakigpulong apan nagdasok ang mga dumadapig ug nahimong main violation ang social distancing. Charot!”

Kataw-anan man tuod kini palandungon apan basin mamahimo na kining epektibo ning panahona karon. Hinuon ang atong mga katigulangan kaniadto ug gani bisan karon mohalad man gihapon og mga halad pagkaon ngadto sa mga nangamatay. Balansayon nga nasunod nato gikan sa mga insik sa ilang Ancestor Worship.

Sa laing bahin, mahimong atong saulogon na lang ang Todos Los Santos ug Todos Los Defuntos pinaagi sa pag-ampo, novena ug misa.

Diha sa kahilom sa tagsatagsa nato ka mga panimalay. Nahimong nasirad-an man tuod ang mga sam-ang apan pabilin kitang konektado sa mga kaigsuonan natong mga nangamatay.

Dili sila makatabang sa ilang kaugalingon kondili pinaagi sa atong mga pag-ampo ug pagtabang espiritu ngadto sa kahayag nga mao si Kristo sila makalabang. Angayan lamang nga ato silang iampo ug atong ihalad ang atong mga ginagmay apan kinasingkasing sakripisyo alang sa kapahulayang dayon sa ilang  kalag.

Pahulay nga dayon ihatag kanila O Ginoo ug ang Kahayag nga way Pagkapalong modan-ag kanila.