Sa hinayhinay gipatay

Kini ang sentiment sa kadaghanan sa dihang magpabiling abli ang mga dapit kalingawan sama sa mga beach resorts, malls ug uban pa. Ang mga sam-ang diin patay naman unta ang nagpuyo kinahanglan man nga sirad-an. Goodbye sentido common. Dunay mga pamaagi man gyud unta nga mahimo sa pagmatngon ning atong panahon.

Kini naglambigit ning mosunod:

- A.   Pag-designate og mga adlaw sa pagduaw.

- B.   Sa maong mga designated days sama pananglit sa kada barangay hatagan lang og igong panahon ug gidaghanon.

- C.   Sa maong pagsuroy kun i-deploy ang mga tanod o police nan. Mamahimong makontrolar ra man gyud unta ang bul-og sa mga tawo ning panahona.

Kining maong pandemiya nga gikan sa mga komunistang Tsina ug gidasonan sa mga mapahimuslanong negosyante padayong niut-ot sa tabunong nasud sa sidlakan. Tinugotan kini sa hiniktan sa liog nga tigdumala. Hinuon ang itoy padayong motilap sa lapalapa sa agawon aron lamang higugmaon. Ang maong pagpagamit niresulta man hinuon sa padayong pagkatun-as sa tanlag sa matag usa.

Nahimong uga ang pag-ampo ug nahimong makasapot ang mga panghitabo. Daghanan pud ang nihimong bogo sa mga makinaadmanon pinaagi sa pagtuis sa ilang mga bulawanong mga pagtulon-an aron lamang ilisan og mga hinanggaw nga mga panultihon. Hinuon unsay mapaabot mo gikan sa mga tawo nga lapok og panghunahuna?

Tungod sa ilang kapakyas ug kabawo sa ilang gilauman nga kausaban ilang gilatas ang dulom nga dalan sa kawalay kapaingnan. Ang pagpunay og sabasaba, pagpanglutos ug pagpangyubit sa mga tinarong nga mga lakang usa man lamang ka pamaagi sa pagtabon sa ilang kaugalingong kabogoan.

Tinuod nga sa hinay hinay gipatay ang naandang balansayon ug tradisyon ginamit ang peste nga COVID-19 apan padayon ra sa gihapon nga mobarog ang iya sa Ginoo.

Ug kun ugaling kining maong tunglo nga gihampak kanato gumikan ra pud sa atong pag abli sa mga ganghaan diin gipasulod nato ang yawan-ong gahum sa maupigong sistema. Maayo man ang pag-ampo labina kun ubanan kini og lihok nga pinasikad.