Kahuyang ba gud ang paghilak?

Dili pa  lang dugay dunay pagbaha nga nahitabo didto sa Sogod sa amihanang bahin sa Sugbo. Buhawi ang ilang gituohan nga maoy hinungdan kun nganong nahitabo kadto. Naguba ang mga kabalayan ug ug dunay mga patigayon nga naapektuhan. Ang angayan lang gyud pasalamatan mao man nga wala'y kinabuhi nga nakalas.

Nihimo dayon og lakang ang LGU pinangulohan ni Mayor Richard Streegan uban sa iyang kapikas nga si Vice Mayor Monyeen Durano Streegan. Ang maong hitabo nakaabot gyud dayon sa pandungog ug sa buhatan ni Gov. Gwen Garcia. Hinungdan nga miadto gyud dayon ang gobernadora sa nahisgutang lungsod aron mohatag og ayuda ug miduyog sa gibating kasub-anan sa kadaghanan didto. Kuyog sa maong pagduaw mao man ang wala tuyoang pagtukbil sa pagbati sa kadaghanan miresulta sa pagbakho sa uban. Bisan gani ang mga pangulo sa nahisgutang lungsod nihilak man.

Apan dunay nakapahatag nako og igong pagtagad. Kini tungod kay dunay mga nikomentaryo og laughing emojis sa maong talan-awon ug dunay nipabuhagay pud sa ilang mga panahom ug pangindahay nga unta matagad pud ang ilang panginahanglan sa presensiya sa gobernadora. Ako nakapangutana hinuon: “Kahuyangan ba ang paghilak?” O duna lay laing nisantop sa hunahuna ning mga ni send og laughing emojis. Hinuon dili ko makatubag niana.

Apan alang kanako ang paghilak pagpadayag lamang sa atong pagkatawhanon. Ang atong pagkatawhanon nga samaran ug mahimong masakitan. Apan wala kini magpasabot og pag-undang ni pagsibog. Dunay mga higayon nga kinahanglanon nato nga mohilak. Dunay mga higayon nga angayan kitang magbangotan aron kita maayo. Unta ang tanan mamahimong sensitibo sa panginahanglan ug pagbati sa uban.

Ayaw yubita ang pagbakho sa uban tungod kay nahimong lig-on pa ang imong kaugalingon ug halayo ka pa sa suliran. Basin ang imong pagbiay biay mamahimong mantsa sa imong kaugalingong kalibutan. Sympathy means wearing the same shoes nga gisul-ob sa uban.