Sulat ni Rama wa kadulot

Nindot ang gipakitang aksiyon ni acting Cebu City mayor Michael ‘Mike’ Rama pinaagi sa iyang pagpadala og sulat-hangyo sa Inter-Agency Task Force (IATF) nga unta tugotan ang mga sam-ang sa siyudad sa Sugbo nga ablihan kini sa Adlaw sa mga Minatay, Nobiyembre 1 ug 2, 2021.

Buwahan, mahatagan untag kahigayonan ang mga tagtungod nga makagakos sa mga bungdo nga hagbay rang wala nila mahalarig mga bulak, kandila ug pag-ampo.

Apan mas nindot ang pinaling hukom sa IATF nga sirhan gyod tanang menteryo (pribado man, o publiko) sugod Oktubre 29 hangtod Nobiyembre 2.

Buwahan, makontrolar ang pagdagsa sa daghang manuaw. Ug malikayan ang gikahadlokang paspas nga pagtinakdanay.

Tingali, nakita sa IATF nga kon tugotan ang kamenteryohan sa pagpangabli sa nahisgotang mga adlaw, delikadog ang pagpasunod sa health protocols sama sa social distancing ug uban pa, dili sa tanang higayon matuman.

Angay hinumdoman. May mga sam-ang nga naghuot na ang mga panteyon. Gawas nga nagdikitdikit, dunay naglut-odlut-od! Unya may mga buhi pang namuyo ibabaw sa mga nitso, kinsa kugihan kaayong mohimog bata.

Niini pa lamang sitwasyona, nawala na daan ang social distancing. Samot na, kon buksan ang mga menteryo sa Adlaw sa mga Minatay.

Okay ra unta kon usag-usa nato, may disiplina sa kaugalingon. Kaantigo morespeto sa health protocols bisag walay otoridad nga nagbantay.

Apan daghan gihapong labad-gahi. Mangaway pa’g polis, bisag igo rang ipasul-ob ang face mask!

Busa, niining panahon nga padayon pa kitang nakigkombati sa COVID-19, bisan tuod og mihinay na ang pagtinakboyay, dili maayong mokompiyansa.

Pahugtan pa nato ang atong pagkamabinantayon.

Bisag fully vaccinated na, sunod gihapon sa health protocols. Unya kadtong wala pa magpabakuna, pagpabakuna na!

Ug sa tanang mayor, ayaw’g ipaubos inyong mga mabinantayong kumo. Miaksiyon na paghinay ang pagtinaptanay sa COVID-19. Ayaw lugaki atong pakig-away. Ipermanente ang tako.

Ayaw kahadlok nga mawad-an mog botos sa umaabot eleksiyon tungod kay gitak-opan ninyo ang kamenteriyohan sumala sa mandar sa IATF.

Acting Mayor Rama, pasagding wala kadulot imong sulat-hangyo. Nindot ang desisyon sa IATF. Nakadugang og puwersa sa atong pagpakigkombati. Busa, husto ra imong hukom nga mosunod nila. Ang importante, kitay modaog batok sa COVID-19. Kay sa maong kadaogan, ikaw usab, midaog!