Fake news!

Dunay mga kandidato dinhi sa Sugbo nga way mikontra, ug nagpasabot nga sigurado na ang ilang kadaogan.

Apil kanila si Talisay City Mayor Samsam Gullas nga midagan pagka kongresista sa Cebu’s 1st congressional district gikan sa Talisay ngadto sa Sibonga.

Ang lain mao si 6th district Congressman Emmarie Lolypop Ouano-Dizon nga midagan pagka kongresista sa Mandaue City’s lone district apan way miatbang. Kon ako ang pagbut-on, magbaylo sila si Samsam ug ang iyang asawa nga si Rhea Gullas nga midagan usab pagka mayor sa Talisay City.

Hangtud sa Nobiyembre 15, gitugot ang “substitution” sa mga kandidato. Sayon ra kaayo, ang Partido Alayon mopadagan ni Rhea nga puli ni Samsam, ug si Samsam mobalik pagdagan pagka mayor sa Talisay.

Nganong nakahunahuna man ko niini? Tungod kay mahimong dili makapaniguro si Rhea nga modaug batok kang Vice Mayor Allan Bucao nga midagan usab pagka mayor.

Kon adto siya mo-substitute sa 1st congressional district, wa nay problema ug sigurado na nga siya mahimo nga kongresista, ug si Samsam dako kaayo’g kahigayonan nga modaog gihapon pagka mayor. Di ba?

Pero, hinuon, tan-aw nako, ang kaanyag ni Rhea usa sa makahatag og dakong konsuylo kaniya nga ang mga botante, ilabi na gyud ang mga lalaki, anha mobotar kaniya.

Aw, bisan og si Rhea asawa lang ni Samsam, pero nakita na nako nga kining maong pamilya sinsero gyud sa pangalagad sa gobiyerno.

* * *

Nakasaway gyud ko sa ubang tawo nga mohimo og lakang nga himo-himoan nila og bakak ang usa ka kandidato sa tumong nga madaut kini ug wa nay mobotar.

Tiaw mo nga gipublikar sa social media nga kuno ang usa ka kandidato pagka gobernador dinhi sa Central Visayas, andam na kuno nga magbutang og kwarta sa mga mayor aron ipamalit og botos?

Gipatuo nga ang maong gobernador naghimo og “post” sa social media, naay iyang hulagway, ug ang iyang mensahe sa kilid nga gi-bold pa.

Pastilan, pagka iresponsable nga pamahayag. Ang utok nga way kinaadman mao ra gyud ang mailad sa naghimo niini.

Kon tinuod man nga ang kandidato pagka gobernador nagplano nga mamalit, ngano gud intawon nga ipublikar man niya kini sa social media?

Nakaingon ko nga maayo siya nga mohimo og mga post nga makatoo ka nga tinuod kon dali-dalion ra nimo’g tan-aw, apan kon imong sabton, masabtan nimo ang iyang pagka peke. Mao lagi kini nga nakaingon ko, nindot ang social media kay ang mga tawo makagamit na man niini, apan giabusohan lang.

Daghang nahimong automatic nga reporter, columnist sa Facebook, apan daghan ang miabuso sa paghimo’g mga peke nga inpormasyon aron pagdaut sa isig ka tawo.