Negosasyon dinhi sa Sugbo

Sulagma lang ba ang dungan nga pagbisita dinhi sa Sugbo nilang kanhi senador Bongbong Marcos ug Davao City Mayor Sara Duterte o kabahin na ni sa mga lakang alang sa ilang plano sa politika sunod tuig?

Miabot sa Sugbo si Marcos Biyernes sa buntag alang sa opisyal nga pagbukas sa iyang headquarters. Misunod sab si Sara pag-abot hapon sa samang adlaw alang sa pipila ka mga kalihokan nga iyang tambongan karong adlawa didto sa lungsod sa Liloan.

Ang duha pulos maayo og rating sa mga survey ug dili ikalimod nga kun sila magpares alang sa 2022 elections dako og kahigayonan nga sila magmalampuson.

Ideal sab kun mahitabo ang ilang tandem sanglit si Marcos gikan sa norte samtang si Sara gikan sa habagatan.

Si Marcos una na nga miduso sa iyang certificate of candidacy alang sa pagkapresidente samtang si Sara miduso og COC alang sa pagpasubli pagkamayor sa Davao.

Apan dili pa imposible nga mahitabo ang tandem sa duha hangtud sa Nobyembre 15 diin gitugot sa Comelec ang substitution. Mahimong moatras si Sara sa iyang reelection ug molansar sa mas taas nga pwesto sama sa pagkapresidente o ba kaha bise presidente.

Si Marcos mahimo sab nga mosibog ug molansar sa mas ubos nga posisyon pinaagi sa substitution.

Ang ila lang kinahanglan mao nga duna kandidato nga miyembro og partido nga mosibog aron sila maoy mo-substitute. Ug sigun sa kasaligang tinubdan mao ni usa sa mga importanting rason nga nia sa Sugbo si Sara ug Bongbong.

Matud pa nga nagtagbo ang duha alang sa negosasyon kinsa nila ang mahimong presidente ug kinsa ang bise.

Ug kumbinsido ko nga modagan gyud si Sara pagkapresidente. Ang kinahanglan nalang hiloton mao nga mosugot si Bongbong nga mosibog aron mamahimo niyang bise. Ang body language ni Sara nagpakita nga di layo ang posibilidad sa iyang pagdagan pagkapresidente.

Ang resulta sa surveys igo na nga rason aron hingpit mokumbinsir niya. Anaa sab niya ang makinarya sa Malakanyang kumo anak sa presidente.

Busa dili na ko mahibong og karong adlawa atol sa mga kalihokan nga iyang tambongan didto sa Liloan ipahibawo ni Sara ang iyang pagpapili pagkapresidente ug ang ilang tandem ni Bongbong.