Maagang vote buying
Binabatikos si Senador at Presidential hopeful na si Manny Pacquiao dahil sa pamamahagi niya ng tulong pinansyal sa mga mahihirap. Sa kabila ng katakut-takot na pagtuligsa, tiniyak ni Pacquiao na hindi siya maglulubay sa pagtulong sa mga mahihirap.
Kapag naipinta ng isang pulitiko ang sarili sa bilang taong madaling lapitan at hingan ng tulong pinansyal, tiyak madali nitong makukuha ang boto nila anuman ang posisyong hinahabol ng isang kandidato. Malinaw ang pakay ni Pacquiao. Dahil wala pa namang campaign period, hindi pa maituturing itong pamimili ng boto.
Hanga ako sa TV host na si Willie Revillame. Matagal na niyang na-establish ang kanyang personahe bilang taong walang habas sa pamamahagi ng milyun-milyong piso sa kanyang programa sa telebisyon. Kaya maaga pa lang ay pinipilahan na sa istasyon ng telebisyon ang kanyang palatuntunan.
Hindi mo masisisi ang mga taong ito na kabilang sa tinatawag na pinakamahirap sa mga mahihirap na nagbabakasakaling palarin at maging instant millionaires.
Kaya nang alukin siya ng administrasyon na maging bahagi ng senatorial ticket nito, pinag-isipan niya itong mabuti at hindi naglaon ay tinanggihan niya ang alok. Siguradong mananalo siya porke sandalan siya ng mga taong naghihikahos sa buhay. Pero paano kung manalo siya at mapipilitang umalis sa programa, saan siya kukuha ng mga sponsor para ipagpatuloy ang pamamahagi ng milyones? Marunong mag-analisa si Willie.
Naiisip kaya ni Pacquiao na kahit bilyones ang hawak niyang salapi ay maubos din ito kung ipamumudmod niya sa lahat ng mahirap lalo pa’t itutuloy niya ang pagpapatayo ng libreng pabahay sa mga dukha? Maganda ang layunin ni Pacman Ngunit paano ito ipagpapatuloy kung maubos ang kanyang resources?
- Latest