Dugang kalbaryo

Sunod-sunod ang pagpatuman sa mga kompaniya sa lana og usbaw sa presyo sa ilang mga produkto.

Ang labing awahing usbaw gipatuman niadtong Martes--P1.50 matag litro sa diesel ug P1.80 matag litro sa gasolina. Kini maoy ikawalong semana sa sunod-sunod nga umento.

Sulod lang sa duha ka buwan moabot na sa P8.65 matag litro ang kinatibuk-ang umento sa presyo sa diesel samtang P7.20 sab matag litro ang gasolina.

Sukad sa pagsugod sa tuig 2021 mokabat na sa P18 matag litro ang kinatibuk-ang umento sa presyo sa diesel samtang P19.70 sab matag litro ang sa gasolina.

Dili pa ni maoy katapusan tungod kay posibling laing umento na sab ang ipatuman sa moabot nga mga semana.

Matud sa Department of Energy (DOE), ang pagsaka sa presyo sa krudo sa kalibotanong merkado ug ang pagsulbong sa demand tungod sa pag-abli na og balik sa mga industriya nga nga naapektohan sa pandemya maoy hinungdan sa sunod-sunod nga umento sa presyo.

Apektado sab ang produksiyon tungod sa dili maayong kahimtang sa panahon didto sa Gulf of Mexico diin nahimutang ang labing dakong crude oil producer sa kalibotan.

Sa kasamtangan moabot na sa P54 matag litro ang presyo sa diesel samtang kapin sa P60 ngadto sa P70 ang gasolina.

Taliwa sa sunod sunod nga usbaw sa presyo sa mga produktong petrolyo gipaabot sab ang dakong epekto niini sa presyo sa mga nag-unang palaliton ug sa pletihan.

Gani ang kahugpongan sa mga drayber ug operator nangayo na og labing minus P3 nga umento sa pletihan.

Ang Land Transportation Franchising ang Regulatory Board nagtuon na sa petition apan ang Department of Transportation dunay sugyot nga sulbad sa problema aron malikayan ang umento sa pletihan.

Plano sa DOTr ang pagpanghatag og fuel subsidy inay itugot ang umento sa pletihan.

Way dautan sa plano sa DOTr apan mas gikinahanglan sa katawhan ang malungtarong sulbad sa problema inay band-aid solution.

Dili lang transportation sector ang apektado sa pagsaka sa presyo sa mga produktong petrolyo kon dili ang tibuok katilingban.

Ang mga mamumuo nga dugay nang nagping-it sa dyutay nga sweldo maoy labaw'ng makaluluoy tungod kay daghan nila daan nang apektado sa pandemya.

Samtang way umento sa suholan ug lisud sad nga ipangayo og umento taliwa niining nagpadayon nga pandemya, gidugangan pa ang kalbaryo sa mga mamumuo tungod sa pagtuyang sa mga kompaniya sa lana pagpausbaw sa ilang presyo.

Dinalian nga pagtagad sa problema ang gipaabot sa publiko nga aksiyon gikan sa nasudnong kagamhanan ug dili pamalikas.

Hinaut nga ang kasamtangang sitwasyon makapukaw sa kadaghanan nga sa eleksiyon sunod tuig di sila masayop pagpili sa mosunod ta'ng mga lider.