Pastilan kon maoy magdaghan

Humna na ang filing for certificate of candidacy niadtong mga politico kinsa molansar alang sa 2022 national election.

Bisan sa malanog panawagan gikan sa bagang duot sa katawhan, kinsa nag-awhag: “Run, Sara, Run!” nga maoy nakahimo niyang number 1 kanunay sa tanang presidentiable survey nga gipahigayon, giklaro na ni Inday Sara Duterte, nga dili gyod siya mokandidato sa pagka-presidente.

Ug gipahimug-atan kini ni Tatay Digong, kinsa mipahibalo sa publiko, nga pugngan g’yud niya si Inday sa paglansad.

Sa habig ni Sen. Bong Go, kini miklaro usab nga dili mokandidato pagka-pangulo.

Taga Luzon uban sa minilyong dumadapig ni Bongbong Marcos, kusganong midasig nga palansaron siya pagka-presidente, kay sila misalig sa iyang kapasidad diha sa pagpadayon unya sa ‘Build, Build, Build’ ug ubang mga mapuslanong proyektong makasalbar sa kalisod sa Pilipinas nga nasugdan sa administrasiyon ni Duterte.

Pahiyom ug simple ra ang tubag ni Bongbong. Matud niya, taas kaayo iyang respeto sa pamunoan ni Duterte. Sa panid sa social media, daghang nitizen ang mi-post: ‘Marcos-Duterte tandem. From North to South, very solid!’

Samtang si Senador Manny Pacquiao desidido gayud nga mag-presidente. Among katabang, akong gipangutana: “Mader, si Pacquiao midagan pagka-presidente sa Pilipinas, mobotar ka?”

“Adto kong Isko Moreno, Tay, uy!” Pintok niyang tug-an. “Guwapo man kaayo siya, Tay. Hamis pa kaayog pamanit. Nakita nako siya personal. Haskang tisoya lagi!” Apas-dayeg niya.

Naamang kog kadiyot, uy! Pastilan, kon maoy magdaghan, diin ang basehan mao ang panagway sa kandidato, pagkaluoy sa mga pangit, no?

Dili gyod kadaog! Hinuon, sunod tuig pa ang piniliay. May hataas pa kaming higayon sa pagpasabot sa giisip na namong igsuong katabang, kinsa ang tukmang kandidato nga angay pilion?