Kiko-kiko nga lider

Suknaon pa ni Senador Bato dela Rosa si Presidente Duterte kon uyon ba kini nga magkaatbang sila ni Sara Duterte-Carpio kon ugaling modagan usab kini sa pagka-presidente. Dugang pa sa senador, “sundalo” siya nga andam motuman sa kamanduan sa liderato sa PDP-Laban.  May’pag magpakahilom lang una ang senador. Ang iyang pamahayag nagmatuod nga, kon simbako modaug siya, pagadumalahon lang ang nasud og usa ka kikô-kikô.  Angayan hinuktokan sa senador ang panultihon nga, “Ang kikô-kikô gawasnon lang kon nakauyon siya sa mga hilo nga naghigot kaniya”.  Fezteleern

Bakunahan samtang natulog

Matud pa ni Presidente Duterte, kinahanglan pangitaon sa mga awtoridad kadtong naghiko-hiko pa sa pagpabakuna batok COVID-19 ug bakunahan sila atol sa ilang paghikatulog aron makab-ot na ang gitinguha nga herd immunity batok sa virus. Bunga lang ba kaha sa kasagmuyo ang pamahayag sa Presidente apan tataw nga mahinungdanon ang kooperasyon sa tanan kon buot nato nga mahibalik sa normal ang atong pagkinabuhi. Kay ginaingon man nga, “Dili lamang sa atong gipangbuhat, kon dili sa wala usab nato pagbuhat sa angayan buhaton, nga kita mahimong adunay tulobagon”.  Pabakuna na!

Saad bugti sa botó

Mipasalig si Senador Lacson ug Senador Sotto nga dili nila pasayloon ug taralon gayod bisan pa man ang mga miyembro sa gabinete kon sila ang modaug pagka-presidente ug bise-presidente karon Election 2022.  Sa demokrasya’ng kagamhanan sama sa Pilipinas, ang politika usa ka transaksyon tali sa politiko ug botante diin ang politiko mangayo og boto sa katawahan pinaagi sa ilang mga saad, samtang ang katawhan usab mangayo’g saad bugti sa ilang boto.  Human sa eleksyon, ang talan-awon mao nga ang politiko malimot sa iyang mga saad ug magpahimulos sa iyang pwesto samtang nagpaabot na usab sa sunod nga eleksyon.  Paleho la!

Nanguhit ang asawa

Adunay sugyot ang Archdiocese sa Cebu ngadto sa kagamhanan sa dakbayan sa Sugbo nga kadto lamang  nabukanahan na ang tugotan nga makasulod sa sementeryo sa Adlaw sa mga Santos ug sa Adlaw sa mga Kalag sa Nobyembre 1 ug 2. Angayan tun-an kini pag-ayo kay aduna kini implikasyon sa atong kustombre ug pagtuo.  Basin mahisama unya sa estorya sa bana nga nagreklamo sa pagpunay’g panguhit sa iyang asawa matag kaadlawaon.  Sa dihang gipasabot nga natural lang nga manguhit kay asawa man, mitubag ang bana nga, “Ok ra gyud ko nga kuhiton sa akong asawa; ang problema lang kay tulo na man ka tuig sukad siya namatay”.   Pagkatoytoy!

Paingon sa gipadulngan

Gikunhoran pag-usab sa International Monetary Fund ang growth forecast sa Pilipinas nunot sa pagtuo nga ang ekonomiya sa nasud dili makakab-ot sa gitumbok nga mga targets samtang ang nasud nag-atubang pa sa pandemiya.  Mora’g padayon pa ang kalisod sa katawhan. Niining gipanglantawan nga kahimtang sa atong ekonomiya, haum ang panultihon nga, “Kon dili nato usbon ang atong tumong, hayan mahidangat kita sa atong gipadulngan.” Madahaaan