Lisod gyud kong kabus kita

“Dili lang mi moreklamo sir kay wala man gihapon mi mahimo basta ang gusto lang namo mahatagan og maayong lubong ang akong apo bisan sa menteryo lang maangkon niya ang permanenteng kapoy-an kay wala gyud na siya makasuway nga nakapuyo og usa ka balay kay sa aseras ra intawon na gihimugso ug nagdako.”

Mao kini ang makapatukbil sa kasingkasing nga pulong nga akong nabati gikan ni Liza Ugsang, ang apohan sa 11-anyos nga si Christ Brainer Ugsang nga namatay human madat-ugi og puthaw nga railing niadtong adlawng Domingo sa dalan P. Burgos baranggay Sto. Niño dakbayan sa Sugbo.

Sumala sa apohan nga gikapoy ang bata nga nag-uban sa inahan niini sa pagpaninda og kandila busa nilingkod sa daplin sa karsada diin gipahimutang ang mga railings nga gigamit niadtong filing sa COC.

Apan gumikan sa kakusog sa hangin niadtong higayona ug samotan nga wala matarong ang pagpahiluna sa railing, dali ra kaayo kining natumba og didto gyud maigo sa lawas sa bata.

Natabang pa sa iyang apohan ang bata ug nadala sa tambalanan apan wala magdugay nakabsan gyud sa kinabuhi. Anaa karon gihaya sa usa ka kapilya ang bata kay wala man silay balay sangling anaa ra man sila sa daplin sa karsada magpuyo.

Lisod kaayo ang kahimtang sa pamilya sa bata sanglit ang iyang inahan nga usa ka mamaligyaay og kandila ang nagbuhi kanila diin aduna siyay laing tulo ka mga igsuon.

Dugay nang namatay ang iyang amahan maong wala gyuy paglaum nga mahaw-as sila sa aseras bisan gani ang iyang pag eskwela naglisod sila busa grade one ra gyud ang iyang nahuman.

Naa siyay lolo nga tiguwang na sad, samtang ang iyang lola tiguwang na pud ug na stroke pa gyud. Maong kutob nalang siya sa pangandoy nga makapuyo unta og balay, apan namatay nalang wala gyud mahatagi og katumanan.

Dunay impormasyon nga akong nakuha nga dihang na-report kini sa media, naa kunoy nangasaba sa pamilya sa bata nganong ni-report sila ug nahimo na hinuon nga dakong issue.

Pastilan sila na gani ang namatyan sila pa ang nakasab-an, busa haum lang nga imbistigahon ang nahitabo kinsa ang angayan nga manubag, kumo nalang kay kabus dili nalang kini hatagan og attention.

Makaingon ta nga lisod kaayo kong kabus kay gustohon man nila nga mangayo og katin-awan ug maningil sa angayan nga paninglan sa dakong sipyat nga misangpot sa kamatayon sa bata sila pa ang nagpanghadlok tungod kay wala man silay ikasarang.  Huwaton nalang nato ang resulta sa gipahigayon nga imbistigasyon sa komite ni Konsehal Dave Tumulak sa nahitabo sa bata kay matod niya dunay sipyat tungod kay posibleng dili balanse ang tiil o base sa railing maong dali ra kaayo natumba dihang gihapak sa hangin.