Dili “tenor” ang tingog

Hingpit na’ng gitak-opan ni Bise Presidente Robredo ang ganghaan sa paningkamot nga mahiusa ang oposisyon human napakyas siya sa pagpakigsabot sa uban’g mga kandidato.  Ang kapakyas naggumikan sa pipila ka mga kasungian ilabi na sa punto unsaon pagdumala ang nasud.  Kon tinguha ni Robredo mao nga mamahimong siya’ng standard bearer sa oposisyon, daw kuli na kini nga mahitabo.  Ang pagpangutana kon “Kinsa ang Lider?” sama ra sa pagpangutana kon “Kinsay tenor sa grupo nga Quartet?”  Labing klaro, siya kadtong maantigo mokanta’g  tenor. Basin sa panglantaw sa uban, bisan sa iyang pagpasiugda, dili “TENOR” si Robredo.  Hala no!

Bulok sa kwarta

Gipasabot ni Bise Presidente Robredo nga ang paggamit niya sa kolor nga rosas (pink), inay dalag (yellow), nagsimbolo nga, ni’ng iyang pagdagan isip Presidente, adunay lahi nga away nga iyang giatubang karon nga mao ang pagbatok sa “pagbalik sa anak sa diktador.”  Nakapahibulong kini sa uban tungod kay siya man ang pangulo sa Liberal Party kansang opisyal nga kolor mao ang Yellow.  Dili na kinahanglan ang pagpasabot ni Robredo.  Sa kasaysayan sa eleksyon sa Pilipinas, dili ang bulok sa uniporme sa kandidato, kon dili ang bulok sa salapi, ang mahinungdanon sa mga botante.  Vote buying pa more!

Touch move unta

Nakugang ang kadaghanan ni’ng kalit nga pagduso ni Senador “Bato” de la Rosa sa iyang COC sa pagka-presidente.  Adunay mga spekulasyon nga mo-withdraw ra gihapon og hulipan ra unya siya ni Sara Duterte-Carpio.  Dili ba kini’ng maong gimik timaan sa kakulang sa sinseridad sa pagpagngalagad?   Ni’ng gibuhat ni Senador de la Rosa, makahandum na lang kita nga sama sa dula nga ahedres (chess), touch move na pud unta inig file sa COC. Wala na’y bawiay.  Fezteleern!

Tayo-tayo’ng sistema

Matud ni Vaccine czar Carlito Galvez, Jr., adunay mga gobernador nga nagmakuli sa pagpang-apod-apod sa mga COVID-19 vaccines ngadto sa mga kalungsoran tungod sa pamolitika.  Wala na gyud diay gipili ang pagpamolitika kay bisan pagpamakuna gisakyan pa..  Tinuod ang panultihon nga ang “Ang tayo-tayo (patronage) maoy labing laksot nga pulong, nga sa iyang kaugalingon, makapukan na sa demokrasya”.  Gani matud pa ni Charles Dickens, “Kon ang diyotay’ng kahibalo makadaot, labaw na gayod ang tayo-tayo nga matang sa politika.”  Madahaaan!

Serbisyo dili negosyo

Alang sa DOH, dili angayan itandi ang presyo sa mga ambulansya nga gipalit sa maong ahensya ug sa gipalit sa PCSO ug mga kagamhanang lokal. Type 1 kuno ang nga ambulansya sa DOH, samtang ang gipalit sa PSCO ug LGU, mga transport vehicles lamang. Managlahi ba diay ang serbisyo sa kagamhanang kay managlahi man ang ambulansya?  Angayan hinumduman nga tinud-anay’ng pagpangalagad maoy labing maanindot nga yugto sa kinabuhi sa usa ka kawani sa gobyerno, ug ang kalampusan kab-oton pinaagi sa pag-alagad sa katawhan; dili pinaagi sa gasto sa katawhan.  Serbisyo dili negosyo!