Kisaw sa politika

Atong makita sa nagkadaiyang suok ang mga politiko nga hinayhinay mituyhakaw ug nagpaila. Daghan kanila ang nigimaw ug nipatim-aw aron sa kadaghanan magpaila. Ang ilang pag-file sa certificate of candidacy usa man ka dayag nga tikang sa tinguha nga magpapili isip moalagad sa katawhan ug ni Haring Lungsod. Hinuon angayang huptan sa matag kandidato kining mosunod nga mga hiyas nga kun atong I summarize nagpasabot man og AIM LOVE. Unsay buot ipasabot niini?

A— as in Availability. Ang pagkaanaa diha sa tanang panahon labina gyud sa mga higayon nga gikinahanglan ang presensiya sa usa ka pangulo ngadto sa ilang isigkaingon.

I — as Intimacy. Ang pangalagad tawag man sa pakighiusa. Ang tawag sa pakighiusa nagpasabot man nga kinahanglang himoong sukaranan ang pagsalig. Diha sa pag-alagad ni Haring Lungsod kinahanglang dili gub-on ang pagsalig nga maoy sukaranan ug kalig-on sa matag relasyon labina gyud diha sa natad sa politika ug serbisyo publiko.

M— as in Motivation ang pagdasig sa matag constituent nga manginlabot sa kalihokang politikanhon. Pagpakita ug pagmatuod nga wala mausik ang ilang boto diha sa imong pangalagad isip politiko. Apan lisud kining mahitabo labina kun ang nilansar mismo dili mao o husto ang motivation.

L — as in Listen kun ang mapaminawong dalunggan ug kasingkasing. Dili mahatag ang tukmang tubag sa mga pangutana kun halayo kita sa pagpaminaw. Paminaw aron mas matino nato kun unsa gayud ang suliran.

O — kun ang Openness kun pagka-abli sa pagdawat ug paghangop ni bisan kinsa nga kabahin sa panaw panggobiyerno.

V— kun ang pag-verify kun husto ug sakto ba ang impormasyon nga nadawat. Daghang mga relasyon nga nangaguba gumikan sa wala'y hinungdang tsismis.

E — kun Empathy kun ang pagbati sa gibati sa imong constituent.

Kun anaa niining maong mga hiyas nan, angayan lamang nga molansar ka ug manimpalad sa bugnong lugaynon.