Nangiwit sa survey?
Mohimo’g usa ka “mahinungdanong pamahayag” si Bise Presidente Robredo sa bisperas sa deadline pagduso sa COC alang sa 2022 Elections. Hayan may kalambigitan kini sa iyang pag-desider kon modayon ba siya o dili pagdagan isip Presidente. Adunay mga gihimong paningkamot ang kampo ni Robredo nga hi-usahon ang oposisyon apan wala kini mosalir. Daghan ang hinungdan sa paghiko-hiko sa kandidato pagduso sa iyang COC. Sa kaso ni Bise Presidente Robredo, dili ba kaha ang hinungdan mao nga “daw wala’y purohan” ang iyang kandidatura? Kay kon basehan ang resulta sa survey, daw nangiwit man siya. Abangan!
Wala’y mahitabo
Sa pag-analisar nga gihimo sa DOH-Central Visayas mahitungod sa 11 ka kamatayon nga gituohan nga mga adverse effects sa COVID-19 vaccines, nasuta nga wala kini kalambigitan sa pagpamakuna kon dili gumikan sa gihambin nga lain’g sakit sa hingtungdan. Hinaut nga kining maong pamahayag makaaghat na sa uban nga magpabakuna. Matud pa bitaw, “Dili nato itugot nga ang kahadlok sa umaabot nga panghitabo, mao na hinoon ang hinungdan nga walay mahitabo”. Sa laing bahin, ngano’ng maghandum man kita’g hataas nga kinabuhi kon sagad kanato wala gani masayod kon unsay buhaton kon mag-ulan sa Dominggo sa hapon”? Pabakuna na!
Trahedya sa panagsumpaki
Sa pagpatuman sa Executive Order No. 143 sa dakbayan sa Sugbo, mitumaw usab ang pangutana kon asa ang hatagan og gibug-aton: ang polisiya ba sa DOLE batok sa diskriminasyon sa mga trabaho-an niadtong wala pa mabakunahi o ang dili pag-abli sa mga kan-anan kon ang ilang tabahante wala pa mabakunahi? Dayag ang panagsumpaki sa duha ka polisiya ug angayan resolbahon. Kay ginaingon baya nga “Ang trahedya mahitabo dili tungod sa panagsumpaki tali sa sakto ug sayop kon dili sa duha ka matang sa sakto”. Ginaingon usab nga ang panagbangi dili lamang tali sa maayo ug dautan kon dili tali usab sa kamatuoran ug sa bakak. Kinsa’y namakak!
Magpaabot sa imbitasyon
Gipanglantawan sa USDA nga ang halin sa sektor sa pagkaon sa atong nasud mokunhod og 13% karong tuiga gumikan sa pagpanagana sa mga konsumidor nga mosulod sa mga restaurant taliwala sa pagkuyanap sa Delta variant. Dili na ikahibulong ang maong kahimtang. Gawas sa kahadlok sa COVID-19, walay kwarta usab ang katawhan kay nihit ang trabaho. Tambag pa sa akong amigo: “Magpaabot na lang kita kon adunay imbitasyon sa birthday o bunyag. Niana’ng higayona, mamantika-an na gyud ang atong mga simod”. Pagkatoytoy!
Kitang tanan Pilipino
Subli nga magpapili pagka-senador isip independiente nga kandidato si Senador Migz Zubiri apan naglaum gihapon siya nga sagopon sa uban’g mga partido sa umaabot nga eleksyon. Matud sa senador, tapat siya sa nasud ug dili sa usa ka partido. Dili dautan ang pagka-independiente? Angayan masayran sa mga politiko nga dili igsapayan sa katawhan kon unsa’ng partido ang nagdumala sa nasud karon. Ang mahinungdanon nga masayod ang tanan nga kita pulos mga Pilipino. Abante Pinoy!
- Latest