Sara ug Sotto

Kon si Inday Sara Duterte kanunay’ng nag-una sa survey sa mga angayang himoong presidente, ang Sugboanong si Tito Sotto mao sab ang kanunay’ng nag-una sa survey ug maoy gusto sa katawhan nga mahimong vice president.

Gilupig pa gud niya si Presidente Duterte nga mipadayag nga gusto unta magpapili pagka-vice president human sa iyang termino. Tingali, gitan-aw sa katawhan ang iyang outstanding performance isip senador.

Gawas nga nahimong Senate president, gidayeg gani siya pag-ayo ni kanhi senador Juan Ponce Enrile kay bisan og dili abogado si Tito Sotto, apan master kaayo siya sa mga patakaran sa Senado.

Tinuod gyud siya nga lider kay patas ang iyang pagtratar sa mga kauban niyang senador bisan og managlahi sila og partido.

Apan ang labaw sa tanan mao nga sukad kaniadtong 2010, wa gyud siyay palta ug wa sab ma-late sa pagtambong sa mga sesyon.

Karon kay modagan man siya pagkabise presidente, wa gyud ko makadungog nga modaot siya sa ubang kaatbang niya nga kandidato. 

Bisan ang mga media nga nag-cover sa Senado nakabantay gyud nga dili bastos nga pagkatawo si Sotto bisan niadtong giayo siya’g atake ni Senador Villar atol sa sesyon.

Gani si Presidente Duterte nakadayeg gyud kang Senador Sotto tungod sa iyang pagka maayong tawo. Kita dinhi sa Sugbo, makapasigarbo usab kay si Sotto usa man ka Sugboanon.

* * *

Balikan nato si Inday Sara Duterte. Daghan kaayo ang naguol sa post ni Dr. Winley Dela Fuente nga nagmagul-anon kuno siya kay dili na gyud kuno modagan.

Bisan og wa niya ilha, apan nakasabot ang nakabasa sa iyang post nga si Inday Sara ang iyang gipasabot nga dili na modagan.

Gani, si kanhi senador Bongbong Marcos mora’g gipul-an na sa pagpinaabot kang Inday Sara ug mipahibawo na lang nga gusto siya nga mag presidente.

Nagtuo ko nga kon personal nga hangyoon ni Presidente Duterte si Inday Sara nga modagan kini sa pagka presidente, tingali makumbinser ra kini.

Dili ikalimod nga daghan kaayong grupo sa lainlaing dapit sa nasud nga nagsuporta kang Inday Sara, ug kon mohukom na siya pagdagan, hitsas na ang iyang makinarya sa politika.

Nagtuo gyud hinoon ko nga may kahigayonan pa nga ning nahibiling mga adlaw, mokalit ra pagpahibawo si Inday Sara nga siya modagan ug dawaton ang hagit sa katawhan nga siya mag presidente.

Kon mahitabo kini, makurat na lang unya ang mga tawo, susama sa nahitabo dinhi sa Cebu City nga sa kalit lang, si kanhi konsehal Margot Osmeña ang mipahibawo nga modagan pagka mayor ug dili ang iyang bana.