Pagsangka mo’g usab

Si Vice Mayor Michael Rama nagtuo nga gitikasan gyud siya kaniadtong eleksyon sa 2016 ug mao nga napilde siya ni kanhi mayor Tomas Osmeña.

Sa eleksiyon karong Mayo sa sunod tuig, si Rama nagpahibawo na nga siya magpapili pagkamayor ug unta magsangka sila pag-usab si Osmeña.

Mao kini ang higayon nga maila gyud kon kinsa ang pinangga sa mga botante. Apan ang nadunggan nako nga ang lansaran ni Osmeña mao ang pagka kongresista sa Cebu City south district.

Para kanako, dili malingaw si Osmeña sa ilang panagsangka ni Konsehal Edu Rama nga maoy modagan atbang kaniya.

Nakadungog ko’g komentaryo sa radyo tabla ra kuno og milihay si Osmeña og mas bug-at nga kaatbang ug mao nga si Kongresista Rodrigo Abellanosa ang iyang padaganon batok ni Rama.

Pero og adto ka mangutana sa taga BOPK, matud nila nga dili gyud hakog og gahum si Osmeña kay andam niyang itugyan ang pagka mayor sa laing kauban.

Aw, maayo sab, apan mas nindot gyud nga magsangka pag-usab sila si Osmeña ug Rama. Hinuon, dili kita makabuot kay iya usab kana nga disisyon.

* * *

Modagan gyud diay ang artista nga si Richard Yap pagka kongresista sa Cebu City north district kay mi-file na man gani kini sa iyang Certificate of Candidacy.

Mora’g maapektohan niini ang botos nga makuha unta ni Konsehal Niña Mabatid kay ang mobotar ni Yap, ang mga kaalyado man nilang Rama ug Labella.

Kaniadtong Domingo, ang mga konsehal sa kabarangayan dinhi sa Cebu City nga nagtawag sa ilang pundok og BARKADA (Barug Katawhan sa Dakbayan), nag-press con aron ipahibawo ang suporta nila kang Yap.

Ang uban kanila mga dumadapig ni Konsehal Mabatid sa miaging eleksiyon. Usa sa namulong mao si Busay Barangay Konsehal Amilo Lopez nga wa na mosuporta kang Mabatid kay dili kuno motuman og saad.

Hala, pag-estorya lang unya mo kon unsay mga saad ni Mabatid nga gilubong lang sa kalimot.

Bahin ni Yap, dili ikalimod nga buotan siya ug hilomon, pero ang usa lang nga angay niyang usbon mao ang pagkalihay sa media.

Kaniadto, nanghatag siya’g contact numbers apan dili diay makontak kon may isyu nga angay’ng kuhaan og reaksyon gikan niya.

Nakadungog ko nga si Rachel Cutie Del Mar sabakon na sa BOPK sa iyang pagdagan pagkakongresista sa north district.

Kon mao ni, maisip nga lig-on usab siya nga kandidato ug dili angay’ng kumpiyansahan nila ni Mabatid ug Yap.

Silang tulo pulos mga ilado, ang gikinahanglan aron respitohan sa katawhan mao ang reputasyon nga kon mosaad, tumanon gyud aron nga dili mahimong usa ka bakakon.